راولپنڈی: یوم آزادی کی آمد کے ساتھ ہی راولپنڈی میں جشن آزادی کی تیاریاں زور و شور سے جاری ہیں، شہر کے مرکزی بازاروں، تجارتی مراکز اور اہم شاہراہوں کو قومی پرچموں، سبز و سفید جھنڈیوں اور خوبصورت آرائش سے سجا دیا گیا ہے۔
راجہ بازار، صدر، کمیٹی چوک، مری روڈ، ٹینچ بھاٹہ، پیرودھائی، کمرشل مارکیٹ سمیت مختلف تجارتی علاقوں میں دکانوں اور خصوصی اسٹالز پر جشن آزادی کے سامان کی خریداری کے لیے شہریوں کا رش بڑھ گیا ہے۔
یہ بھی پڑھیں: پاکستان کا 78واں یوم آزادی: ملک بھر میں سبز ہلالی پرچموں کی بہار، جگہ جگہ آتش بازی
خصوصی اسٹالز پر قومی پرچم، بیجز، اسٹیکرز، کیپس، ہیڈ بینڈز، کلائی بینڈز، سبز و سفید مفلرز، گاڑیوں اور موٹر سائیکلوں کی سجاوٹ کا سامان سمیت دیگر آرائشی اشیا دستیاب ہیں، جن کی خریداری کے لیے بچے، نوجوان اور خاندان بڑی تعداد میں بازاروں کا رخ کر رہے ہیں۔
شہر کے مختلف علاقوں میں شام ہوتے ہی بازار روشنیوں سے جگمگا اٹھتے ہیں، جبکہ سبز ہلالی پرچموں کی بہار اور ملی نغموں کی گونج نے جشن آزادی کا ماحول پیدا کر دیا ہے۔
دکانداروں کا کہنا ہے کہ 14 اگست قریب آنے کے ساتھ ہی جشن آزادی کے سامان کی طلب میں مسلسل اضافہ ہو رہا ہے اور شہریوں میں قومی پرچموں اور آرائشی اشیا کی خریداری کا جوش و خروش نمایاں ہے۔
یہ بھی پڑھیں: جشن آزادی کی تیاریاں، شہری یوم آزادی کیسے منائیں گے؟
راجہ بازار میں خریداری کے لیے آنے والے شہریوں کا کہنا ہے کہ یوم آزادی خوشی، شکر گزاری اور تجدید عہد کا دن ہے، وہ ہر سال اپنے بچوں کے ساتھ قومی پرچم اور جشن آزادی سے متعلق سامان خریدتے ہیں تاکہ نئی نسل میں حب الوطنی اور قومی شعور کو فروغ دیا جا سکے۔
شہریوں کے مطابق 14 اگست صرف خوشی منانے کا موقع نہیں بلکہ ان قربانیوں کو یاد کرنے کا دن بھی ہے جن کے نتیجے میں پاکستان وجود میں آیا۔ ان کا کہنا ہے کہ جشن آزادی کے موقع پر ہر شہری کو ملک کی ترقی، استحکام اور خوشحالی کے لیے اپنا کردار ادا کرنے کا عزم کرنا چاہیے۔
