فیک نیوز روکنے کے لیے صحافتی برادری کو کردار ادا کرنا ہوگا، عظمیٰ بخاری

عظمیٰ بخاری کا کہنا تھا کہ صحافی صرف صحافی ہوتا ہے، وہ کسی کا کارکن یا ترجمان نہیں ہوتا۔ انہوں نے کہا کہ بعض لوگوں کے پاس کیمرہ اور مائیک ہوتا ہے، انہیں مکمل آزادی حاصل ہوتی ہے، لیکن ہر شخص جو یہ کام کرتا ہے اسے صحافت نہیں کہا جا سکتا۔

انہوں نے صحافتی برادری سے مخاطب ہوتے ہوئے کہا کہ خاموشی اپنی عزت اور وقار کو نقصان پہنچا رہی ہے۔ اچھے صحافی خبر دینے سے پہلے تمام فریقین کا مؤقف لیتے ہیں اور دوسرے کی رائے بھی شامل کرتے ہیں۔

ان کا کہنا تھا کہ کسی پر الزام لگایا جائے کہ اس نے کروڑوں روپے کی جائیداد بنائی یا کسی منصوبے میں بدعنوانی کی تو اس کا ثبوت بھی دینا ہوگا۔ صرف کسی کو بدنام کرنے یا سنسنی پھیلانے کے لیے خبر دینا درست نہیں۔

عظمیٰ بخاری نے کہا کہ بنیادی حقوق کی بات ضرور ہونی چاہیے، لیکن قومی مفاد سب سے مقدم ہے۔ ہم سب پہلے پاکستانی ہیں، اس کے بعد ہماری دیگر شناختیں ہیں۔

انہوں نے کہا کہ اگر کوئی ملک دشمن عناصر کی زبان بولے، پاکستان کے خلاف بات کرے یا علیحدگی پسندی اور مسلح جدوجہد کی حمایت کرے تو اس کی مخالفت کرنا ضروری ہے۔ ان کا کہنا تھا کہ جب یہ شواہد موجود ہوں کہ دشمن ممالک اپنے مذموم مقاصد کے لیے پراکسی عناصر استعمال کر رہے ہیں تو صحافیوں کی ذمہ داری مزید بڑھ جاتی ہے۔

وزیر اطلاعات پنجاب نے بلوچستان کے حوالے سے بات کرتے ہوئے کہا کہ صوبہ پاکستان کا حصہ ہے اور وہاں کے عوام کی فلاح و بہبود کے لیے اقدامات کیے جا رہے ہیں۔ انہوں نے بتایا کہ بلوچستان کے طلبہ سمیت تمام صوبوں کے نوجوانوں کو مواقع فراہم کرنے کی کوشش کی جا رہی ہے، جبکہ وزیر اعلیٰ پنجاب کے لیپ ٹاپ اور اسکالرشپ پروگرام میں بھی مختلف صوبوں کے طلبہ کو شامل کیا گیا ہے۔

انہوں نے کہا کہ صحافی رائے عامہ بنانے والے افراد ہوتے ہیں، اس لیے ان کی ذمہ داری عام لوگوں سے زیادہ ہوتی ہے اور انہیں ہر معاملے میں حقائق اور قومی مفاد کو مدنظر رکھنا چاہیے۔