جرمنی کی ایک میڈیکل ٹیکنالوجی کمپنی نے ایسا اسمارٹ ٹوائلٹ سیٹ تیار کیا ہے جو عام واش روم کے استعمال کے دوران صرف 30 سیکنڈ میں دل کی دھڑکن کا معائنہ کرکے بے ترتیب دھڑکن، خصوصاً ایٹریل فبریلیشن (AFib) کی ممکنہ نشاندہی کرسکتا ہے۔
رپورٹ کے مطابق ’ہارو ای کے جی سیٹ‘ بظاہر عام ٹوائلٹ سیٹ جیسا ہے، تاہم اس میں ایسے سینسر نصب کیے گئے ہیں جو بیٹھنے کے دوران جسم سے برقی سگنلز حاصل کرتے ہیں۔ یہ سینسر 6 لیڈز پر مشتمل ای کے جی ریکارڈ کرتے ہیں اور نتائج بلوٹوتھ کے ذریعے موبائل فون کی ایپ کو بھیجتے ہیں۔ صارف کو جسم پر کوئی الیکٹروڈ لگانے یا الگ سے کوئی ڈیوائس پہننے کی ضرورت نہیں ہوتی۔
AT-HOME READ: A German medical tech company built a toilet seat that records your heart rhythm in 30 seconds flat. The HARO EKG-seat uses built-in sensors to capture a six-lead EKG while you sit — no sticky pads, no wearable, no instructions needed. A connected app then analyzes… pic.twitter.com/fhuqNXHqpN
— Fox News Health (@foxnewshealth) August 7, 2026
کمپنی کے مطابق تقریباً 30 سیکنڈ کی ریکارڈنگ کے بعد موبائل ایپ دل کی دھڑکن کا تجزیہ کرتی ہے اور ممکنہ بے قاعدگی کی نشاندہی کرتی ہے۔ ابتدائی تحقیق میں اسمارٹ سیٹ کے ای کے جی نتائج کا روایتی 12 لیڈ ای کے جی سے موازنہ کیا گیا، جس میں دونوں نظاموں کے نتائج میں خاصی مطابقت سامنے آنے کا دعویٰ کیا گیا ہے۔
ایٹریل فبریلیشن دل کی بے ترتیب دھڑکن کی ایک عام قسم ہے۔ بعض افراد میں اس کی کوئی واضح علامت ظاہر نہیں ہوتی، تاہم یہ فالج کے خطرے میں اضافہ کرسکتی ہے۔ اسی لیے روزمرہ معمول کے دوران بار بار دل کی دھڑکن ریکارڈ کرنا ایسی کیفیت کی بروقت نشاندہی میں مددگار ثابت ہوسکتا ہے۔
یہ بھی پڑھیں:آنکھوں کا ویسکولر سسٹم دل کی بیماریوں کے خطرات ظاہر کرسکتا ہے، تحقیق
تاہم ماہرین نے واضح کیا ہے کہ اس ڈیوائس کے نتائج کو حتمی طبی تشخیص نہیں سمجھا جاسکتا۔ اس کی تحقیق کے مکمل نتائج ابھی آزادانہ طور پر کسی طبی جریدے میں شائع نہیں ہوئے، اس لیے مزید تحقیق ضروری ہے۔
رپورٹ کے مطابق ڈیوائس فی الحال عام خریداری کے لیے دستیاب نظر نہیں آتی۔ کمپنی نے اس کی سابقہ قیمت تقریباً 2 ہزار 870 ڈالر بتائی تھی۔
