عالمی شہرت یافتہ فٹبالر کرسٹیانو رونالڈو اور ان کی دیرینہ ساتھی جارجینا روڈریگز نے 10 سالہ تعلق کے بعد پرتگال میں ایک نجی تقریب کے دوران شادی کرلی۔ تقریب کا انعقاد ساحلی شہر کاسکائس میں ہوا جس میں جوڑے کے پانچ بچے بھی شریک ہوئے۔
شادی کے اعلان کے لیے جوڑے نے صرف ایک تصویر شیئر کی، جس میں دونوں کے ہاتھ ایک دوسرے پر رکھے ہوئے اور سونے کی شادی کی انگوٹھیاں نمایاں ہیں۔ تصویر کے ساتھ ‘C ❤️ G’ لکھا گیا۔
View this post on Instagram
سادہ مگر دلکش عروسی انداز
جارجینا کے عروسی انداز نے فیشن اور بیوٹی حلقوں کی توجہ حاصل کی۔ انہوں نے سفید رنگ کا لمبی آستینوں والا لباس زیب تن کیا، جو ان کے عمومی طور پر نمایاں اور پرتعیش فیشن اسٹائل کے مقابلے میں خاصا سادہ دکھائی دیا۔
تاہم لباس کے ڈیزائنر اور مکمل عروسی لباس کی تفصیلات تاحال منظرعام پر نہیں آئیں۔
ملکی وائٹ ناخن بھی توجہ کا مرکز
جارجینا کے مینیکیور نے بھی خاصی توجہ حاصل کی۔ ان کے ناخن ہلکے، نیم شفاف ملکی وائٹ رنگ میں تھے، جو روایتی فرنچ مینیکیور اور نیوڈ شیڈ کے درمیان ایک سادہ اور نفیس انداز پیش کرتے ہیں۔
سادہ شادی کی انگوٹھی، نمایاں منگنی کی انگوٹھی
جارجینا کے ہاتھ میں سادہ سونے کی شادی کی انگوٹھی نمایاں تھی جبکہ اس کے ساتھ ان کی منگنی کی انتہائی نمایاں انگوٹھی بھی موجود تھی۔
ان کی منگنی کی انگوٹھی کے سائز اور قیمت کے بارے میں گزشتہ برس مختلف اندازے سامنے آتے رہے ہیں تاہم اس کی حتمی قیمت یا سائز کی باضابطہ تصدیق نہیں کی گئی۔
پانچوں بچے تقریب میں شریک
رپورٹس کے مطابق تقریب میں رونالڈو اور جارجینا کے پانچوں بچے شریک تھے۔ ان میں کرسٹیانو جونیئر، جڑواں بچے ایوا ماریا اور میٹیو، الانا مارٹینا اور بیلا ایسمرالڈا شامل ہیں۔
تقریب کی نوعیت انتہائی نجی رکھی گئی اور مہمانوں یا تقریب کی دیگر تفصیلات عوامی سطح پر جاری نہیں کی گئیں۔
یہ بھی پڑھیں: رونالڈو کی اہلیہ جارجینا روڈریگز کون ہیں؟ عام زندگی سے عالمی شہرت تک کیسے پہنچیں؟
شادی سے قبل رونالڈو کے آبائی شہر فنچال، مادیرا میں واقع ایک کیتھیڈرل کے باہر بڑی تعداد میں مداح جمع ہوگئے تھےکیونکہ افواہ تھی کہ رونالڈو اور جارجینا کی شادی وہاں ہونے والی ہے۔ تاہم دونوں وہاں موجود نہیں تھے اور اسی دوران ایک مقامی جوڑے کی شادی جاری تھی۔
رونالڈو اور جارجینا نے بالآخر 11 اگست کو کاسکائس میں نجی تقریب کے ذریعے شادی کی تصدیق کردی۔
ابھی تک شادی کے مکمل لباس، تقریب کے مقام اور ممکنہ بڑی تقریب سے متعلق مزید تفصیلات سامنے نہیں آئی ہیں۔ بعض پرتگالی رپورٹس میں امکان ظاہر کیا گیا ہے کہ بعد میں ایک بڑی تقریب بھی منعقد کی جا سکتی ہے۔
