اسلام آباد میں مبینہ غیر قانونی کال سینٹر کے خلاف کارروائی کے بعد گرفتار سیکڑوں غیر ملکی شہریوں کی منتقلی کے معاملے میں اہم پیشرفت سامنے آئی ہے۔ حکام نے گلبرگ کے پلازہ کو سب جیل قرار دینے کا نوٹیفکیشن واپس لے لیا ہے جس کے بعد گرفتار غیر ملکی شہریوں کو مرحلہ وار اڈیالہ جیل منتقل کرنے کا عمل شروع کر دیا گیا ہے۔
یہ بھی پڑھیں: اسلام آباد: شراب برآمدگی کیس سے سینکڑوں غیر ملکی شہریوں کی گرفتاری تک، اصل معاملہ کیا ہے
ذرائع کے مطابق غیر ملکی شہریوں کی پاکستان سے واپسی کے لیے بھی کارروائی شروع کردی گئی ہے اور بعض اطلاعات کے مطابق تقریباً 284 غیر ملکی شہریوں کو 15 روز کے اندر پاکستان سے واپس بھیجنے کا منصوبہ ہے۔
تاہم اس معاملے میں یہ واضح ہونا باقی ہے کہ کن افراد کو فوری طور پر ملک بدر کیا جائے گا اور کن ملزمان کو زیرِ سماعت مقدمات کے باعث عدالتی کارروائی مکمل ہونے تک پاکستان میں رکھا جائے گا۔
قانونی طور پر زیرِ سماعت مقدمات، جوڈیشل ریمانڈ اور امیگریشن کارروائی کے باہمی تعلق کی تفصیلات حکام کی جانب سے مزید واضح کیے جانے کا امکان ہے۔
ذرائع کے مطابق اسلام آباد کی نجی ہاؤسنگ سوسائٹی گلبرگ گرینز میں کارروائی کے دوران گرفتار کیے گئے غیر ملکی شہریوں میں چین، ویتنام، انڈونیشیا اور ملائیشیا کے باشندے شامل ہیں۔ گرفتار افراد کے خلاف وفاقی تحقیقاتی ادارے (ایف آئی اے) اور نیشنل سائبر کرائم انویسٹی گیشن ایجنسی (این سی سی آئی اے) کی جانب سے الگ الگ مقدمات درج کیے گئے ہیں۔
تازہ پیش رفت کے مطابق گرفتار غیر ملکی شہریوں کو اب نجی ہاؤسنگ سوسائٹی میں قائم عارضی سب جیل میں رکھنے کے بجائے اڈیالہ جیل منتقل کیا جا رہا ہے۔
ذرائع کا کہنا ہے کہ منتقلی کا عمل مرحلہ وار مکمل کیا جا رہا ہے اور پہلے مرحلے میں رات گئے تقریباً 250 ویتنامی شہریوں کو سخت سیکیورٹی میں اڈیالہ جیل منتقل کیا گیا جبکہ باقی غیر ملکی شہریوں کی منتقلی بھی مکمل کی جا رہی ہے۔
ذرائع کے مطابق گلبرگ کے پلازہ کو سب جیل قرار دینے کا نوٹیفکیشن واپس لے لیا گیا ہے۔ اس سے قبل بڑی تعداد میں گرفتار غیر ملکی شہریوں کو رکھنے کے لیے انتظامی طور پر نجی عمارت کو سب جیل قرار دینے کے اقدامات کیے گئے تھے۔
تاہم اب تمام گرفتار افراد کو اڈیالہ جیل منتقل کرنے کا فیصلہ کیا گیا ہے۔ ذرائع کے مطابق گزشتہ روز غیر ملکی شہریوں کے ویزے منسوخ کرکے انہیں خصوصی پرمٹ جاری کیے گئے تھے اور ان کی قانونی حیثیت اور آئندہ ملک بدری کے عمل کو مکمل کرنے کے لیے جیل منتقل کیا جا رہا ہے۔
ابتدائی اطلاعات کے مطابق کارروائی کے دوران تقریباً 400 غیر ملکی شہریوں کو حراست میں لیا گیا تھا تاہم ایف آئی اے اور این سی سی آئی اے کے مقدمات میں نامزد افراد کی تعداد مختلف ہے۔
ایف آئی اے کے مقدمے میں 258 غیر ملکی شہریوں کو ویزا قوانین کی خلاف ورزی اور متعلقہ الزامات کے تحت نامزد کیا گیا، جبکہ این سی سی آئی اے کی جانب سے درج مقدمے میں 114 غیر ملکی ملزمان کو نامزد کیا گیا ہے۔ یوں دونوں مقدمات میں مجموعی طور پر 372 غیر ملکی ملزمان نامزد ہیں۔
یہ فرق اس امر کی طرف بھی اشارہ کرتا ہے کہ کارروائی کے دوران حراست میں لیے گئے افراد اور مختلف مقدمات میں نامزد ملزمان کی تعداد ایک جیسی نہیں ہے۔ حتمی تعداد کا تعین تحقیقات اور عدالتی کارروائی مکمل ہونے کے بعد ہی ممکن ہوگا۔
غیر ملکیوں پر کیا الزامات ہیں؟
حکام کے مطابق گرفتار غیر ملکی شہریوں پر مختلف نوعیت کے الزامات عائد کیے گئے ہیں جن میں ویزا شرائط کی خلاف ورزی، غیر قانونی کاروباری سرگرمیاں، مبینہ غیر قانونی کال سینٹرز چلانا، آن لائن فراڈ اور غیر اخلاقی یا فحش مواد سے متعلق سائبر جرائم شامل ہیں۔
ایف آئی اے کی کارروائی میں بنیادی توجہ غیر ملکی شہریوں کے پاکستان میں قیام اور ویزا شرائط کی مبینہ خلاف ورزی پر ہے، جبکہ این سی سی آئی اے کی تحقیقات میں مبینہ سائبر جرائم، آن لائن فراڈ اور کال سینٹر کی سرگرمیوں کا جائزہ لیا جا رہا ہے۔
یہ امر اہم ہے کہ مقدمات میں عائد الزامات ابھی عدالتی طور پر ثابت نہیں ہوئے اور گرفتار افراد کو قانون کے مطابق اپنا دفاع کرنے کا حق حاصل ہے۔
اس سے قبل ایف آئی اے اور این سی سی آئی اے نے اسلام آباد کی ایک نجی ہاؤسنگ سوسائٹی گلبرگ میں واقع عمارت کے خلاف کارروائی کی تھی۔
ذرائع کے مطابق عمارت میں مبینہ طور پر غیر قانونی کال سینٹرز قائم تھے جہاں بڑی تعداد میں غیر ملکی شہری کام کر رہے تھے۔
ایف آئی اے کے مقدمے میں ویتنامی شہریوں سمیت چین، انڈونیشیا اور ملائیشیا سے تعلق رکھنے والے افراد کو نامزد کیا گیا۔ مقدمے کے مطابق بعض غیر ملکی شہری وزٹ، ٹورسٹ یا بزنس ویزوں پر پاکستان آئے تھے تاہم ان پر الزام ہے کہ انہوں نے ویزا شرائط کے برعکس کاروباری سرگرمیوں میں حصہ لیا۔
مزید پڑھیں: غیر قانونی کرنسی ایکسچینج میں ملوث 2 ملزمان گرفتار، کروڑوں مالیت کی ملکی و غیر ملکی کرنسی برآمد
ذرائع کے مطابق گرفتار افراد کے سفری دستاویزات اور پاکستان میں داخلے کی تفصیلات بھی چیک کی گئیں جبکہ ان کے ویزا ریکارڈ کی جانچ انٹیگریٹڈ بارڈر مینجمنٹ سسٹم کے ذریعے کیے جانے کی اطلاعات ہیں۔
شراب برآمدگی کیس سے کال سینٹر تک تحقیقات
ذرائع کے مطابق مبینہ غیر قانونی کال سینٹر تک پہنچنے والی تحقیقات ایک شراب برآمدگی کے مقدمے کی تفتیش کے دوران شروع ہوئیں۔
تفتیش کا دائرہ آگے بڑھا تو اسلام آباد کی نجی ہاؤسنگ سوسائٹی میں موجود غیر ملکی شہریوں اور مبینہ کال سینٹر کی سرگرمیوں سے متعلق معلومات سامنے آئیں۔
اس اطلاع پر ایف آئی اے اور این سی سی آئی اے نے کارروائی کی اور عمارت میں موجود غیر ملکی شہریوں کو حراست میں لے لیا۔
عدالت میں 372 ملزمان کی ویڈیو لنک کے ذریعے پیشی
کارروائی کے بعد ایف آئی اے اور این سی سی آئی اے کی جانب سے نامزد غیر ملکی ملزمان کو اسلام آباد کی عدالت میں ویڈیو لنک کے ذریعے پیش کیا گیا۔
عدالت نے دونوں مقدمات میں نامزد غیر ملکی شہریوں کو جوڈیشل ریمانڈ پر جیل بھیجنے کا حکم دیا اور آئندہ پیشی کے لیے 26 اگست 2026 کی تاریخ مقرر کی گئی۔
یوں تازہ صورت حال میں ملزمان کو نجی ہاؤسنگ سوسائٹی کے پلازہ میں قائم سب جیل کے بجائے اڈیالہ جیل منتقل کیا جا رہا ہے۔
منتقلی کے دوران چینی خاتون سے تلخ کلامی
غیر ملکی شہریوں کی اڈیالہ جیل منتقلی کے دوران ایک چینی خاتون اور ایف آئی اے اہلکاروں کے درمیان تلخ کلامی کے بعد جھڑپ کی بھی اطلاعات سامنے آئی ہیں۔
ذرائع کے مطابق واقعہ اس وقت پیش آیا جب متعلقہ اہلکاروں کی جانب سے موبائل فونز اور پاسپورٹس حوالے کرنے کا مطالبہ کیا گیا۔ صورتحال کشیدہ ہونے پر پولیس اور ایف آئی اے کی مزید نفری کو موقع پر طلب کر لیا گیا۔
بعد ازاں سیکیورٹی اہلکاروں نے صورتحال کو قابو میں کیا اور غیر ملکی شہریوں کی منتقلی کا عمل جاری رکھا گیا۔
غیر ملکی شہریوں کی منتقلی کے موقع پر پولیس، ایف آئی اے اور این سی سی آئی اے کے افسران بھی موجود رہے۔ سیکیورٹی اہلکاروں نے قافلوں کی صورت میں غیر ملکی شہریوں کو اڈیالہ جیل منتقل کیا۔
یہ بھی پڑھیےـ: این سی سی آئی اے نے مبینہ پونزی اسکیم کا نیٹ ورک بے نقاب کر دیا، غیر ملکی شہری گرفتار
پہلے مرحلے میں بڑی تعداد میں ویتنامی شہریوں کو منتقل کیے جانے کے بعد باقی غیر ملکی شہریوں کو بھی مرحلہ وار اڈیالہ جیل منتقل کیا جا رہا ہے۔
