اسلام آباد میں موسلا دھار بارش کا سلسلہ جاری ہے، جس کے پیش نظر اسلام آباد ٹریفک پولیس نے شہریوں کو دورانِ سفر خصوصی احتیاطی تدابیر اختیار کرنے کی ہدایت کی ہے۔
ٹریفک پولیس کے مطابق بارش کے دوران گاڑی اور موٹرسائیکل کی رفتار کم رکھی جائے اور آگے چلنے والی گاڑی سے مناسب فاصلہ برقرار رکھا جائے۔ ڈرائیونگ کے دوران فوگ لائٹس کا استعمال کرتے ہوئے اپنی لین میں رہیں جبکہ سائیڈ شیشوں، انڈیکیٹرز اور سیٹ بیلٹ کا لازمی استعمال یقینی بنایا جائے۔
یہ بھی پڑھیے اسلام آباد نہ بارش سے محفوظ نہ ڈکیتوں سے، اس شہر کو کس کی نظر لگ گئی؟
موٹرسائیکل سواروں کو ہدایت کی گئی ہے کہ وہ انتہائی بائیں لین میں سفر کریں اور ہیلمٹ کا استعمال لازمی کریں۔ ٹریفک پولیس کے افسران شہریوں کی سہولت اور رہنمائی کے لیے مختلف شاہراہوں پر موجود ہیں۔
اسلام آباد ٹریفک پولیس نے شہریوں کو مزید ٹریفک اپ ڈیٹس کے لیے اس کا واٹس ایپ چینل فالو کرنے کی ہدایت کی ہے۔ شہری اسلام آباد پولیس کے سوشل میڈیا پیجز اور آئی ٹی پی ایف ایم 92.4 سے بھی ٹریفک اور سفری صورتحال سے متعلق رہنمائی حاصل کرسکتے ہیں۔
