بھارت کی ریاست مہاراشٹرا کے ضلع بیڑ کے سرکاری اسپتال میں مبینہ طبی غفلت کا افسوسناک واقعہ سامنے آیا ہے، جہاں 19 سالہ خاتون کی سی سیکشن کے ذریعے بچے کی پیدائش کے دوران اس کے پیٹ میں جراحی کے دستانے اور کاغذی وائپس رہ گئے، جس کے بعد خاتون کی حالت تشویشناک ہوگئی۔
بھارتی میڈیا کے مطابق سندھیہ سورج گائیکواڑ نے یکم اگست کو بیڑ ڈسٹرکٹ اسپتال میں آپریشن کے ذریعے بچے کو جنم دیا تھا اور 4 روز بعد اسے اسپتال سے گھر بھیج دیا گیا۔
خاتون کو گھر جانے کے بعد پیٹ میں شدید درد شروع ہوگیا، جس پر اہل خانہ اسے ایک نجی اسپتال لے گئے۔ طبی معائنے اور اسکین کے دوران ڈاکٹروں کو اس کے پیٹ میں غیر متعلقہ اشیا موجود ہونے کا انکشاف ہوا۔
A 19-year-old woman, Sandhya Suraj Gaikwad, is in critical condition after her family alleged that surgical gloves and paper napkins were left inside her abdomen following a C-section at Beed district hospital. She developed severe abdominal pain days after being discharged and… pic.twitter.com/vUowiARMU6
— IndiaToday (@IndiaToday) August 20, 2026
بعد ازاں خاتون کو ہنگامی بنیادوں پر پونے کے ساسون اسپتال منتقل کیا گیا، جہاں ایک اور آپریشن کے دوران اس کے پیٹ سے جراحی کے دستانے اور کاغذی ٹشو وائپس نکال لیے گئے۔
خاتون کے اہل خانہ نے واقعے پر شدید تشویش کا اظہار کرتے ہوئے طبی عملے پر غفلت اور نااہلی کا الزام عائد کیا۔ خاتون کے شوہر نے کہا کہ طبی ٹیم کی مبینہ غفلت کے باعث ان کی اہلیہ کی حالت انتہائی خراب ہوگئی ہے، جبکہ خاتون کی والدہ کے مطابق ان کی بیٹی میں اپنے نومولود بچے کو گود میں اٹھانے کی طاقت بھی نہیں رہی۔
واقعے کے بعد متاثرہ خاندان نے منگل کو ضلع اسپتال کی انتظامیہ کو شکایت درج کرائی۔
یہ بھی پڑھیں:کینیڈا: پارک میں خاتون پر جنسی حملے کے الزام میں بھارتی نژاد شخص گرفتار
بیڑ کے ضلعی سرجن ستیش کمار سولنکے نے واقعے کی تصدیق کرتے ہوئے بتایا کہ آپریشن میں شامل ڈاکٹر اور دیگر عملے کو نوٹس جاری کردیئے گئے ہیں۔
انہوں نے کہا کہ محکمہ صحت کی تحقیقات میں اگر ڈاکٹر یا عملہ قصوروار پایا گیا تو ان کے خلاف سخت تادیبی کارروائی کی جائے گی۔
