ٹیکنالوجی کی دنیا میں مصنوعی ذہانت یا اے آئی کا استعمال اب صرف ڈیجیٹل دنیا تک محدود نہیں رہا بلکہ اسے حقیقی اور مادی دنیا میں لانے کی کوششیں تیز ہو گئی ہیں۔
یہ بھی پڑھیں: خودکار ڈیلیوری روبوٹس کا تجربہ ختم، سڑکوں سے ہٹا دیے گئے
میٹا کے سابق محققین کے قائم کردہ اسٹارٹ اپ ‘پرسپٹران’ نے ایک نیا فرنٹیئر ویژن اے آئی ماڈل ’ آئیزک 0.5‘ پیش کر دیا ہے، جو صنعتی روبوٹس کو فیکٹریوں اور گوداموں میں دیکھ کر سمجھنے اور کام کرنے کی صلاحیت فراہم کرتا ہے۔
سابقہ میٹا سائنسدانوں کا اقدام
اس اسٹارٹ اپ کی بنیاد ارمن آغاجانیان اور اکشت شریواستو نے نومبر 2024 میں رکھی جو پہلے میٹا کے مشہور ریسرچ ڈویژن فیئر میں کام کر چکے ہیں۔
’ آئیزک 0.5‘ کیا ہے؟
یہ ایک نیا اوپن ویٹ بصری ماڈل ہے جس کا مقصد روبوٹس اور مشینوں کو صنعتی ماحول میں دیکھنے، سمجھنے اور فیصلہ کرنے کے قابل بنانا ہے۔ یہ گوداموں اور فیکٹریوں کی پیچیدہ جگہوں پر نیویگیشن اور ویڈیو ڈیٹا کا تجزیہ کرنے میں مدد کرتا ہے۔
روایتی روبوٹک سافٹ ویئر کے برعکس یہ ماڈل صرف کسی ایک مخصوص کام کے لیے نہیں بنا بلکہ یہ مختلف حالات اور ماحول کے حساب سے خود کو ڈھالنے کی صلاحیت رکھتا ہے۔
روبوٹس کے پیچیدہ مراحل کا حل
مثال کے طور پر سامان کی ترسیل کے لیے روبوٹ کو لیبل پڑھنے، ڈبوں کی جگہ کا اندازہ لگانے، انہیں اٹھانے کی ترتیب طے کرنے اور کام انجام دینے کے لیے مختلف الگورتھم کی ضرورت ہوتی ہے۔ پرسپٹران کا سافٹ ویئر ان تمام مراحل کو ایک ہی لچکدار سسٹم میں حل کرتا ہے۔
مزید پڑھیے: چین روبوٹکس کا عالمی مرکز بننے کی راہ پر، انسانی نما روبوٹس کی تیاری میں نمایاں برتری
اس ماڈل کو سکھانے کے لیے 10 لاکھ گھنٹوں کی عمومی ویڈیوز استعمال کی گئی ہیں جن میں گوپرو اور پہننے والے کیمروں سے لی گئی انسانوں کی روزمرہ نقل وحرکت ایگو (انسان کے اپنے نقطہ نظر/کیمرے سے ریکارڈ شدہ ویڈیوز) اور یو ایم آئی ویڈیوز (انسانوں کی روایتی اور یکساں نقل و حرکت کی ریکارڈنگز) شامل ہیں تاکہ روبوٹ انسانوں کی طرح کام سیکھ سکیں۔
صنعتی استعمال اور سرمایہ کاری
یہ ٹیکنالوجی مینوفیکچرنگ، لاجسٹکس، سیکیورٹی اور ٹرانسپورٹ کے شعبوں میں انقلاب لا سکتی ہے۔ کمپنی اب تک بشمول ‘بیسمر وینچر پارٹنرز’ سے 16 ملین ڈالر کی فنڈنگ حاصل کر چکی ہے اور مزید سرمایہ کاری کی تیاری کر رہی ہے۔ 
واضح رہے کہ فیکٹریوں اور گوداموں میں روبوٹس کا استعمال نیا نہیں ہے اور مشینیں ایک عرصے سے انسانوں کے ساتھ کام کر رہی ہیں لیکن ماضی کے روبوٹس اور اس نئے اے آئی ماڈل میں بنیادی فرق ان کے کام کرنے کے انداز کا ہے۔ پہلے سے موجود روایتی روبوٹس صرف سخت اور محدود کوڈنگ پر چلتے ہیں۔ یعنی اگر کسی روبوٹ کو ایک مخصوص سائز کا ڈبہ ایک طے شدہ جگہ سے اٹھانے کے لیے تیار کیا گیا ہے تو وہ بلا تاخیر وہی ایک کام بار بار دہراتا رہے گا۔ لیکن اگر اس ڈبے کی جگہ چند انچ بدل جائے، اس کا وزن یا سائز تبدیل ہو جائے یا راستے میں کوئی غیر متوقع رکاوٹ آ جائے تو روایتی روبوٹ کام روک دیتا ہے یا غلطی کر بیٹھتا ہے۔
مزید پڑھیں: کیا انسان نما روبوٹس میدان جنگ میں اترنے والے ہیں؟
اس کے برعکس آکسفورڈ اور میٹا کے سابق ماہرین کا تیار کردہ یہ نیا ماڈل یعنی ‘آئیزک 0.5’، روبوٹس کو صرف ایک مشین سے بڑھ کر بصری دماغ فراہم کرتا ہے۔ اس ٹیکنالوجی کی مدد سے روبوٹس انسان کی طرح اپنے ارد گرد کے ماحول کو دیکھ کر، حالات کا اندازہ لگا کر اور سوچ سمجھ کر فیصلہ کرنے کے قابل ہو جاتے ہیں۔ یہ نیا سسٹم روبوٹس کو کسی ایک مخصوص کام تک محدود رکھنے کے بجائے مختلف حالات اور بدلتے ہوئے ماحول کے مطابق خود کو ڈھالنے کی لچک دیتا ہے جس سے صنعتی شعبے میں واقعی خودکار اور ذہین آٹومیشن کا ایک نیا دور شروع ہو رہا ہے۔
