پیپلز پارٹی نئے صوبوں کے معاملے پر ماورائے آئین کوئی کام نہیں ہونے دے گی، شہلا رضا

پاکستان پیپلز پارٹی (پی پی پی) کی رکن قومی اسمبلی شہلا رضا نے کہا ہے کہ نئے صوبوں کے معاملے پر ماورائے آئین کوئی کام نہیں ہونے دیں گے۔

وی نیوز کو انٹرویو دیتے ہوئے شہلا رضا نے کہاکہ صوبہ پنجاب کے لوگ جب محنت کرنے بلوچستان جاتے ہیں اور وہاں سے لاشیں آتی ہیں تو ہمیں بہت تکلیف ہوتی ہے۔

’ہمیں بہت تکلیف ہوتی ہے جب روز کراچی کو برا کہا جاتا ہے اور جنوبی پنجاب سے لوگ چھوٹی چھوٹی مزدوریوں کے لیے کراچی منتقل ہوتے ہیں، کراچی کو برا بھی کہتے ہیں اور پشاور سے زیادہ پشتون کراچی میں رہتے ہیں، ایک سندھ ہی تو ہے جس کا دارالحکومت سب کو پال رہا ہے۔‘

انہوں نے کہاکہ ابھی ہم کراچی میں پولیس ہاکی ٹورنامنٹ کرا رہے ہیں جس میں پنجاب خیبرپختونخوا اور آزاد کشمیر سے بچے شرکت کے لیے آئے ہیں تو میری امیدیں ابھی ختم نہیں ہوئیں کہ جس صوبے میں لوگ رات کو باہر نہیں نکل سکتے وہاں سے لوگ آئے ہیں۔

’میں نہیں سمجھتی کہ ہمارے درمیان نسل پرستی ہے۔ کہیں بدانتظامی ہے تو سیاسی طور پر ضرور اس پر تنقید کریں، مخالفت برائے مخالفت نہ کریں۔‘

’جو لوگ بات چیت پر یقین نہیں رکھتے وہ سیاستدان کہلائے جانے کے لائق نہیں‘

صدر مملکت آصف علی زرداری کے دروۂ یورپ اور لندن اور وہاں سیاسی رہنماؤں کی ملاقاتوں سے متعلق سوال پر ان کا کہنا تھا کہ سیاسی لوگوں کا آپس میں ملاقاتیں کرنا بہت ہی اچھی بات ہے۔

انہوں نے کہاکہ لندن ملاقاتوں میں کیا طے پایا، وہاں لوگوں کے درمیان کیا باتیں ہوئیں، اس بارے میں معلوم نہیں لیکن سیاسی قیادت کا آپس میں ملنا بہت اچھی بات ہے، بات چیت کے دروازے ہمیشہ کھلے رہنے چاہییں۔

شہلا رضا نے کہاکہ جو لوگ بات چیت پر یقین نہیں رکھتے وہ سیاستدان کہلائے جانے کے لائق نہیں ہیں، مجھے تو اِس بات کی خوشی ہے کہ سیاسی قائدین وہاں پر ملے۔ آصف زرداری یا پیپلز پارٹی نئے صوبے بنانے کے مجاز نہیں ہیں۔ سندھ کے مالک سندھ کے عوام ہیں، عوام کا فیصلہ سندھ اسمبلی نے دیا ہے۔

انہوں نے کہاکہ آصف زرداری جب بھی ملک سے باہر جاتے ہیں لوگوں کو مسائل ہو جاتے ہیں حالانکہ ان کی طرح بہادری سے کسی نے جیل نہیں کاٹی، بیمار بھی ہوئے تو یہیں سے علاج کرایا۔

’ماورائے آئین کچھ بھی نہیں ہونے دیں گے‘

اُنہوں نے کہاکہ پاکستان پیپلز پارٹی اِس بارے میں ذرا بھی کنفیوژ نہیں کہ ہم ماورائے آئین کچھ بھی نہیں ہونے دیں گے۔ ہم نے اپنے شہیدوں کو ضمانت دی ہے کہ جب تک ہم زندہ ہیں اِس آئین کو بہتر سے بہتر کریں گے اور ترمیم بھی وہ لائیں گے جس میں دو تہائی اکثریت ہو۔ اگر غلط لوگوں کے ہاتھ میں دو تہائی اکثریت دی گئی تو ایسی صورت میں بھی ہم ثابت قدم رہ کر مقابلہ کریں گے۔

نئے صوبوں کے حوالے سے محسن نقوی کے اعتماد کی وجہ کیا ہے؟

شہلا رضا نے کہاکہ یہ وہ اعتماد ہے جس کی بنیاد پر پاکستان کے آئین کو ماضی میں توڑا گیا۔ کوئی بھی شخص اگر ماورائے آئین بات کرتا ہے تو اس کا مطلب ہے کہ وہ ڈکٹیٹر مائنڈ سیٹ رکھتا ہے۔

’محسن نقوی اور آصف زرداری کے تعلق کے بارے میں باتیں بے بنیاد ہیں‘

شہلا رضا نے کہاکہ ہمارے کلچر کے حساب سے جب آپ اپنے سے کم عمر کسی شخص سے بات کرتے ہیں تو کبھی اسے بیٹا کہہ دیتے ہیں کبھی بھائی کہہ دیتے ہیں۔ میں جب اسپیکر سندھ اسمبلی تھی تو لوگ مجھے میڈم اسپیکر کے بجائے شہلا باجی کہتے تھے اب بھی مجھےکوئی بھابھی کہتا ہے، کوئی آپا کہتا ہے، یہ ہمارے کلچر کی خوبصورتی ہے جو کہ رہنی چاہیے۔

’خواجہ آصف، احسن اقبال کے بجائے وزیرِ قانون کا بیان پیپلز پارٹی کے مؤقف کے قریب ہے‘

شہلا رضا نے کہاکہ ہر شخص کا حق ہے وہ اپنی رائے رکھے، خواجہ آصف ہائبرڈ نظام کے حامی ہیں، احسن اقبال کے بیانات اور طرح کے ہیں لیکن وفاقی وزیر قانون اعظم نذیر تارڑ کا بیان پیپلز پارٹی کے مؤقف سے زیادہ قریب ہے۔ ن لیگ کو وِکٹ کے چاروں طرف نہیں کھیلنا چاہیے۔

انہوں نے کہا کہ مسلم لیگ (ن) کو واضح پیغام دینا چاہیے کہ آیا وہ آئینی طریقہ کار کے ساتھ ہے، اور اگر محسن نقوی کوئی اور پیغام لے کر آ رہے ہیں تو یہ واضح ہونا چاہیے کہ آیا وہ مسلم لیگ (ن) کا پیغام ہے یا کسی اور کا۔ پیپلز پارٹی کا پیغام آئین کے ساتھ ہے۔

’سندھ میں بدانتظامی کے بارے میں پروپیگنڈا کیا جاتا ہے‘

انہوں نے کہاکہ ڈاکٹر حفیظ پاشا نے اپنی کتاب میں لکھا ہے کہ گورننس اور کارکردگی کو ناپنے کے 29 پیمانے ہیں جن میں سب سے زیادہ سندھ میں عملدرآمد ہو رہا ہے۔ محسن نقوی کے پاس سی ڈی اے ہے، اسلام آباد کا امن و امان ہے لیکن کتنے مسائل ہورہے ہیں۔

انہوں نے کہاکہ سندھ میں اِتنا بڑا سیلاب آیا ہم نے اتنی ہی بڑی وہاں پر ہاؤسنگ اسکیم دے دی۔ آپ ہمارے اسپتال دیکھیں، ہمارے بجلی گھر دیکھیں، ہم نے سب سے زیادہ یونیورسٹیاں بنائی ہیں، اسپتال بنائے ہیں، اٹھارویں ترمیم کے بعد سب سے زیادہ بجلی ہمارا صوبہ پیدا کر رہا ہے اور کیا کریں۔ سندھ مخالف مہم کو بند کیا جانا چاہیے۔

’سندھ کا اسکول سسٹم ورلڈ کمپیٹیشن کے لیے گیا ہے‘

شہلا رضا نے کہا کہ پنجاب تو اپنے اسکولوں کو آؤٹ سورس کر رہا ہے جبکہ ہمارے دیہی سندھ کے اسکول ورلڈ کمپیٹیشن کے لیے گئے ہیں۔ سندھ کے نظام تعلیم کے بارے میں ابھی ایک صحافی نے بات کی تو بتایا گیا کہ 92 ہزار نوکریاں میرٹ پر دی گئی ہیں اور وہ جن نوکریوں کے بارے میں بات کر رہے تھے وہ ہمارے سے پہلے کی تھیں۔

ایم کیو ایم سے تعلق رکھنے والے وفاقی وزیرِ صحت مصطفیٰ کمال پر تنقید کرتے ہوئے اُنہوں نے کہاکہ وہ ایک وزیر رو رہا ہے کہ میرے پاس تو ایک اسپتال تھا، مجھے تو یہ کہہ کر وزارت دی تھی، 50 سال بعد آپ ایم کیو ایم میں بھی روئے تھے، یہاں بھی روئے، وزارت نہ لیتے۔ مصطفیٰ کمال کا اپنے حلقے میں یہ حال ہے کہ ایک کارنر میٹنگ نہیں کر سکتے۔

’مریم کو سیاسی سمجھ بوجھ کی کمی ہے، بہتر ہے ٹیوشن لے لیں‘

مریم نواز کے حالیہ بیان پر تبصرہ کرتے ہوئے انہوں نے کہاکہ مریم نواز کو وزارتِ اعلیٰ جہیز میں ملی ہے، ان کے لیے اتنا کافی ہے کہ روزانہ تیار ہو کر کسی منصوبے کا افتتاح کر دیں وہ پورا ہو یا نہ ہو، اتنا کافی ہے ان کے لیے۔

انہوں نے کہاکہ پاکستان میں دہشتگردی کے پیچھے بھارتی ہاتھ کسی سے ڈھکا چھپا نہیں۔ مریم نواز کو سیاسی سمجھ بوجھ کی کمی ہے انہیں پڑھنا اور ایسے موضوعات کی طرف دھیان دینا چاہیے۔ مریم نواز کے ساتھ پرویز رشید جیسے بہت سینیئر لوگ ہیں اور ان کے لیے بہتر یہ ہے کہ وہ ٹیوشن لے لیں۔

انہوں نے کہاکہ انہیں اگر بلاول بھٹو زرداری کی منگنی پر بلایا گیا تو وہ بڑے شوق سے شرکت کریں گی۔ لیکن فی الحال اس بارے میں کچھ معلوم نہیں۔

آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں