واٹس ایپ جلد ایسا نیا فیچر متعارف کراسکتا ہے جس کے ذریعے ایسے افراد بھی وائس اور ویڈیو کال میں شامل ہوسکیں گے جن کا واٹس ایپ پر اکاؤنٹ موجود نہیں ہوگا۔
رپورٹ کے مطابق نئے فیچر کے تحت واٹس ایپ صارفین کال کا لنک بنا کر اسے دیگر ذرائع سے شیئر کرسکیں گے، جبکہ وصول کنندہ کمپیوٹر کے براؤزر میں لنک کھول کر بغیر اکاؤنٹ بنائے کال میں شامل ہوسکے گا۔
یہ بھی پڑھیں: واٹس ایپ میں اکاؤنٹ سیکیورٹی مزید مضبوط، صارفین کے لیے نئی سہولیات متعارف
اس فیچر کے ذریعے صارفین کو واٹس ایپ انسٹال کرنے، اکاؤنٹ بنانے اور فون نمبر کی تصدیق کی ضرورت پیش نہیں آئے گی۔
رپورٹ کے مطابق واٹس ایپ مہمان صارفین کے لیے عارضی سیشن کا نظام استعمال کرسکتا ہے تاکہ مستقل اکاؤنٹ کی معلومات کے بغیر کال میں رازداری اور اختتام سے اختتام تک تحفظ برقرار رکھا جاسکے۔
یہ بھی پڑھیں: واٹس ایپ اب کاروباری اداروں سے صارفین کے جوابات پر بھی فیس وصول کرے گا
کال کے میزبان کے پاس مہمانوں کو شامل کرنے کی منظوری دینے، جاری کال کے دوران کسی شریک کو ہٹانے یا مکمل سیشن ختم کرنے کا اختیار بھی متوقع ہے۔
واٹس ایپ کا مہمان کالنگ فیچر فی الحال تیاری کے مرحلے میں ہے اور کمپنی کے بیٹا ورژن میں بھی سامنے نہیں آیا۔ کمپنی کی جانب سے اس کے باضابطہ اجرا کا اعلان متوقع ہے۔
