بلوچستان میں فتنة الہندوستان بی ایل اے (BLA) کے دہشتگردوں نے خاران کے علاقے آری کلاگ میں چوری شدہ بھاری مشینری کے ذریعے پکی سڑک کو نقصان پہنچا کر عوامی نقل و حمل اور تجارتی سرگرمیوں کو معطل کر دیا ہے۔
پاک فوج کے شعبہ تعلقات عامہ (آئی ایس پی آر) کے مطابق 6 اور 7 ستمبر 2026 کی درمیانی رات سیکیورٹی فورسز نے خاران میں سڑک بلاک کرنے اور ٹریفک معطل کرنے کی دہشتگردانہ کوشش کو ناکام بنا دیا۔ کارروائی کے دوران بھاری مقدار میں دھماکہ خیز مواد برآمد کیا گیا اور متعدد دہشتگردوں کو ہلاک کر دیا گیا۔
یہ بھی پڑھیے ’فتنۃ الہندوستان‘ کا بلوچستان کی معیشت پر حملہ، تجارتی گاڑیوں کی لوٹ مار اور عوام کا معاشی استحصال
دوسری جانب مشخیل میں بی ایل اے نے لیتھیم کی تلاش کے ایک اہم معاشی منصوبے پر حملے کی ذمہ داری قبول کی ہے، جہاں انہوں نے 4 ڈرلنگ مشینیں اور 5 گاڑیاں نذرِ آتش کر دیں۔ یہ پروجیکٹ خطے کے لیے معاشی ترقی اور روزگار کا بڑا ذریعہ ثابت ہو سکتا تھا۔
سیکیورٹی حکام کا کہنا ہے کہ دہشتگردوں کا طریقہ کار بالکل واضح ہے۔ پہلے وہ سڑکوں اور ترقیاتی منصوبوں کو تباہ کر کے عوامی مشکلات میں اضافہ کرتے ہیں، اور پھر انہی مشکلات کو ریاست کے خلاف گمراہ کن پروپیگنڈے کے لیے استعمال کرتے ہیں۔ عوام کو سہولیات سے محروم کرنے والے یہ عناصر خود کو بلوچوں کا خیر خواہ نہیں کہہ سکتے۔
یہ بھی پڑھیے کالعدم بلوچستان لبریشن آرمی کو فوری طور پر عالمی پابندیوں کی فہرست میں شامل کیا جائے، چین کا سلامتی کونسل میں مطالبہ
ترجمان نے مزید کہا کہ غیر ملکی سرپرستی میں چلنے والا یہ ملک دشمن ایجنڈا مکمل طور پر ناکام ہوگا، اور ریاست بلوچستان میں سڑکوں کا جال، تعلیمی و طبی سہولیات اور معاشی مواقع کی فراہمی کا سلسلہ ہر صورت جاری رکھے گی۔
