پشاور کی مقامی کنزیومر کورٹ نے پاکستان کے معروف کلاتھنگ برانڈ کو برانڈ لوگو والے کیرینگ بیگ کے اضافی پیسے وصول کرنے پر مجموعی طور پر 50 ہزار روپے کا جرمانہ عائد کر دیا۔
پشاور کی کنزیومر کورٹ میں شفق عامر نامی خاتون نے دسمبر 2025 میں ایک درخواست دائر کی تھی، جس میں انہوں نے موقف اپنایا تھا کہ کھاڈی کی پشاور برانچ سے انہوں نے 7 ہزار روپے کی خریداری کی تھی اور اس کے باوجود ان سے کیرینگ بیگ کے اضافی پیسے لیے گئے۔ انہوں نے بتایا کہ کھاڈی کے لوگو والے کیرینگ بیگ کے 30 روپے لیے گئے۔
یہ بھی پڑھیں: دھوکا کھانے والے صارفین کے لیے کنزیومرکورٹ سے بڑی خوشخبری
انہوں نے موقف اپنایا کہ کیرینگ بیگ پر برانڈ کا لوگو موجود ہے، جو ایک طرح سے کمپنی کا اشتہار بھی ہے، اس لیے اضافی چارجز لینا ناانصافی ہے۔
کنزیومر کورٹ کے جج نصر اللہ خان گنڈاپور نے کیس کی سماعت کی، جس کے دوران دونوں جانب کے وکلا نے دلائل دیے۔ کھاڈی کے وکیل نے اعتراف کیا کہ اضافی چارجز لیے گئے ہیں، تاہم کہا کہ کیرینگ بیگ لینا صارف کی مرضی پر ہے۔ اگر صارف کہے تو اسے اضافی چارجز پر بیگ دیا جاتا ہے۔
یہ بھی پڑھیں: وارنٹی کے اندر ریفریجریٹر کیوں خراب ہوا؟ عدالت نے کمپنی کے خلاف بڑا فیصلہ سنا دیا
عدالت نے دلائل سننے کے بعد فیصلہ سناتے ہوئے کیرینگ بیگ کے لیے اضافی چارجز کو غیر قانونی قرار دیا اور کلاتھنگ برانڈ کھاڈی پر 50 ہزار روپے کا جرمانہ عائد کردیا۔
عدالت نے کھاڈی کو 30 روپے خاتون کو واپس کرنے اور 25 ہزار روپے ہرجانہ ادا کرنے کا حکم دیا۔ عدالت نے برانڈ کو مزید 25 ہزار روپے جرمانہ سرکاری خزانے میں جمع کرانے کا بھی حکم دیا اور کیس نمٹا دیا۔
