جماعت اسلامی کے ترجمان نے دعویٰ کیا ہے کہ پیٹرولیم لیوی کے خاتمے کے لیے جماعت اسلامی کے اسلام آباد مارچ کے شدید دباؤ کے بعد حکومت نے ایک بار پھر جماعت اسلامی سے باضابطہ رابطہ کر لیا ہے اور معاملات کو مذاکرات کے ذریعے حل کرنے پر زور دیا ہے۔
وفاقی وزیر احسن اقبال نے نائب امیر جماعت اسلامی لیاقت بلوچ سے رابطہ کر کے کل (ہفتہ کے روز) مذاکرات کی خواہش کا اظہار کرتے ہوئے کہا کہ حکومت تمام مسائل بات چیت سے حل کرنا چاہتی ہے۔
یہ بھی پڑھیے پیٹرولیم لیوی کے خلاف جماعت اسلامی کا سپر لانگ مارچ، شیڈول جاری
اس رابطے پر ردعمل دیتے ہوئے لیاقت بلوچ نے کہا کہ حکومت کو باضابطہ جواب امیر جماعت اسلامی حافظ نعیم الرحمان اور سینئر قیادت سے مشاورت کے بعد دیا جائے گا۔ تاہم انہوں نے واضح کیا کہ پیٹرولیم لیوی کے مکمل خاتمے تک احتجاجی تحریک جاری رہے گی۔
واضح رہے کہ حکومت اور جماعت اسلامی کے درمیان اب تک مذاکرات کے 5 دور ہو چکے ہیں۔ پہلے دور میں حکومتی وفد جماعت اسلامی کو مذاکرات کی دعوت دینے خود منصورہ لاہور گیا تھا، جبکہ اس کے بعد کے 4 دور اسلام آباد میں منعقد ہوئے۔
یہ بھی پڑھیے حکومت نے 4 سالوں میں بجلی کے بل اور 2 سالوں میں پیٹرولیم لیوی سے کتنے ارب روپے کمائے؟ حیران کن اعداد و شمار
دونوں فریقین کے درمیان آخری مذاکراتی نشست بدھ 16 ستمبر کو ہوئی تھی۔
