خیبرپختونخوا کے ضلع کوہاٹ میں پرانا پولیس لائنز کی مسجد اور پولیس کمپلیکس پر ہونے والے خودکش حملے کی ذمہ داری خارجی گل بہادر گروپ نے قبول کرلی ہے، جبکہ پولیس اور سیکیورٹی فورسز کی جوابی کارروائی میں حملے میں ملوث تمام 8 دہشتگرد ہلاک کردیے گئے۔
میڈیا رپورٹ کے مطابق تحریک طالبان گل بہادر (ٹی ٹی جی) کے دھڑے نے حملے کی ذمہ داری قبول کرتے ہوئے دعویٰ کیا ہے کہ اس کی ’البدار استشہادی بٹالین‘ نے ’اتحاد المجاہدین پاکستان‘ کے پرچم تلے یہ مشترکہ کارروائی کی۔
کوہاٹ پولیس لائنز حملے میں ملوث تمام دہشتگرد ہلاک pic.twitter.com/SrorDqjBQr
— MUDASSIR I KHATTAK (@M_i_khattak97) September 19, 2026
رپورٹ کے مطابق خارجی گل بہادر گروپ کا تعلق تحریک طالبان پاکستان سے بتایا جاتا ہے اور اس کے افغانستان میں محفوظ ٹھکانے ہونے کا بھی دعویٰ کیا گیا ہے۔
خیبرپختونخوا پولیس کے مطابق دہشتگردوں کے خلاف آپریشن مکمل کرلیا گیا ہے اور ایلیٹ فورس کمانڈوز، سی ٹی ڈی ٹیموں اور سیکیورٹی فورسز نے پولیس کمپلیکس کے اہم حصوں کو کلیئر کردیا ہے۔ آئی جی خیبرپختونخوا ذوالفقار حمید خود جائے وقوعہ پر موجود رہے اور آپریشن میں حصہ لینے والے اہلکاروں کی حوصلہ افزائی کی۔
پولیس حکام کے مطابق دہشتگردوں نے رات ایک بج کر 20 منٹ کے قریب اس وقت پرانا پولیس لائنز کی مسجد اور کمپلیکس کو نشانہ بنایا جب جمعے کی نماز ادا کی جارہی تھی۔ خودکش حملہ آور نے بارود سے بھری گاڑی پولیس کمپلیکس کی دیوار سے ٹکرائی جس کے نتیجے میں زوردار دھماکا ہوا، بعد ازاں مسلح دہشتگرد فائرنگ کرتے ہوئے سی ٹی ڈی کمپاؤنڈ میں داخل ہوگئے۔
یہ بھی پڑھیں:کوہاٹ پولیس لائنز میں خودکش دھماکا، شہدا کی تعداد 21 تک پہنچ گئی، 100 سے زائد زخمی
پولیس کے مطابق تقریباً 8 دہشتگرد عمارت کے اندر داخل ہوئے تھے اور پولیس اہلکاروں کو نشانہ بنانے کی کوشش کی، تاہم پولیس اور سیکیورٹی فورسز نے فوری جوابی کارروائی شروع کردی اور دہشتگردوں کو ایک ہی کمپاؤنڈ تک محدود کردیا۔
پولیس حکام نے بتایا کہ رات بھر جاری رہنے والے آپریشن کے بعد تمام 8 دہشتگردوں کو ہلاک کردیا گیا اور سرچ آپریشن مکمل کرکے پورے کمپاؤنڈ کو کلیئر کردیا گیا۔ آپریشن کی قیادت ایڈیشنل آئی جی سی ٹی ڈی، ریجنل پولیس آفیسر کوہاٹ اور ڈی پی او کوہاٹ نے کی جبکہ جی او سی کوہاٹ بھی موقع پر موجود رہے۔
آئی جی خیبرپختونخوا ذوالفقار حمید نے آپریشن میں حصہ لینے والے افسران اور جوانوں کو شاباش دی اور ان کے لیے انعامات کا اعلان کرتے ہوئے کہا کہ خودکش بمبار نے قانون کے رکھوالوں کو نشانہ بنانے کی کوشش کی تاہم اپنے مقصد میں کامیاب نہیں ہوسکا۔
انہوں نے کہا کہ پولیس، سی ٹی ڈی اور سیکیورٹی فورسز نے بہادری سے دہشتگردوں کا مقابلہ کیا، بہادر جوان قوم کا فخر ہیں اور دہشتگردوں کے ناپاک عزائم خاک میں ملا دیے گئے ہیں۔
⚡ The night-long operation to eliminate clear the Police Compound in #Kohat completed with the elimination of all seven holed up #IUM terrorists; IG Police said.
The death toll from yesterday's blast has risen to 23; majority of whom were offering Friday prayers at a mosque… pic.twitter.com/cAcQigQvvf
— Shafek Koreshe (@shafeKoreshe) September 19, 2026
ادھر کوہاٹ حملے میں شہید پولیس اہلکاروں کی نماز جنازہ پولیس لائنز میں ادا کردی گئی، جس میں پولیس حکام اور کابینہ ارکان نے شرکت کی۔ نماز جنازہ کے بعد شہدا کے جسد خاکی آبائی علاقوں کو روانہ کردیے گئے۔
یاد رہے کہ گزشتہ روز کوہاٹ کے پرانا پولیس لائنز کی مسجد میں نماز جمعہ کے دوران دھماکے کے نتیجے میں 23 افراد جاں بحق جبکہ 100 سے زائد زخمی ہوگئے تھے۔ وزیراعلیٰ خیبرپختونخوا محمد سہیل آفریدی بھی ایک روزہ دورے پر کوہاٹ روانہ ہوگئے ہیں جہاں وہ شہدا کے اہلخانہ سے ملاقات اور زخمیوں کی عیادت کریں گے۔
