وزیراعظم پاکستان شہباز شریف نے بلوچستان کے مختلف علاقوں میں بھارتی سرپرستی میں سرگرم فتنۃ الخوارج اور فتنۃ الہندوستان کے دہشت گردوں کے خلاف سیکیورٹی فورسز کی کامیاب کارروائیوں پر خراج تحسین پیش کیا ہے۔
اپنے ایک بیان میں وزیراعظم نے کہاکہ گزشتہ 96 گھنٹوں کے دوران بلوچستان کے مختلف علاقوں میں 71 سے زیادہ دہشتگردوں کی ہلاکت سیکیورٹی فورسز کی پیشہ ورانہ مہارت اور بہادری کا منہ بولتا ثبوت ہے۔
انہوں نے کہاکہ سیکیورٹی فورسز نے دہشتگردوں کے متعدد ٹھکانوں کو کلیئر کرکے مقامی آبادی کو فتنۃ الخوارج اور فتنۃ الہندوستان کے خطرے سے نجات دلائی۔
وزیراعظم شہباز شریف کا کہنا تھا کہ دہشتگردی کے خلاف جنگ میں پوری قوم اپنی بہادر سیکیورٹی فورسز کے ساتھ کھڑی ہے۔
انہوں نے کہاکہ پاکستان کی سرزمین سے غیر ملکی سرپرستی اور معاونت سے ہونے والی دہشت گردی کا مکمل خاتمہ ہمارا عزم ہے۔
وزیراعظم نے مزید کہاکہ عزمِ استحکام کے تحت دہشتگردی کے خلاف کارروائیاں پوری قوت اور عزم کے ساتھ جاری رکھی جائیں گی۔
واضح رہے کہ سیکیورٹی فورسز نے بلوچستان کے مختلف علاقوں میں کارروائیاں کرتے ہوئے 71 سے زیادہ دہشتگردوں کو ہلاک کردیا ہے۔
