سابق وزیر خزانہ مفتاح اسماعیل نے مسلم لیگ ن سندھ کے جنرل سیکریٹری کے عہدے سےاستعفٰی دیتے ہوئے واضح کردیا ہے کہ وہ انتخابی سیاست میں فعال نہیں ہوں گے۔
مسلم لیگ ن کے صوبائی سیکریٹری جنرل مفتاح اسماعیل نے اپنی پارٹی کے مرکزی سیکریٹری جنرل اور وزیر منصوبہ بندی احسن اقبال کے نام لکھے خط میں اپنا استعفٰی پیش کیا۔
مفتاح اسماعیل نے اپنے خط میں واضح کیا ہے کہ وہ کسی حوالے سے بھی انتخابی سیاست میں سرگرم نہیں رہیں گے۔ ’نہ صرف پارٹی بلکہ حکومت میں بھی ذمہ داریاں سونپنے پر پارٹی قیادت کا شکریہ۔‘
مفتاح اسماعیل کا کہنا تھا کہ پارٹی قائد نوازشریف اور صدرشہباز شریف نے ان کے ساتھ انتہائی مہربان رویہ رکھتے ہوئے ہمیشہ خیال رکھا۔ اپنی حمایت اور اعتماد کے لیے انہوں نے مسلم لیگ ن کی قیادت کی کا شکریہ ادا کیا۔
’سماجی طور پر منصفانہ،معاشی طور پرمستحکم پاکستان دیکھنےکی خواہش کا اظہارکرتا ہوں، میری آپ سمیت پارٹی اور تمام رہنماؤں کےلیے نیک خواہشات ہیں۔‘
