مصنوعی ذہانت یعنی اے آئی پر تحقیق کرنے والی کمپنی ٹرانس لوس نے دعویٰ کیا ہے کہ اے آئی ایجنٹس نے کینیڈا کی ایک حکومتی ویب سائٹ تک رسائی حاصل کرکے اسے ہیک کرنے کی کوشش کی۔
ٹرانس لوس کے مطابق اے آئی ایجنٹس نے 28 مئی اور 9 جون کو لائبریری اینڈ آرکائیوز کینیڈا کی ویب سائٹ تک رسائی کی کوشش کی۔
یہ بھی پڑھیں: 16 ہزار سے زائد بار درخواستیں، اوپن اے آئی ایجنٹس کی اقوام متحدہ تک رسائی کی کوشش
کمپنی نے پیر کو اس سرگرمی سے متعلق کینیڈین حکومت کو آگاہ کیا، تاہم کینیڈین حکام کا کہنا ہے کہ سرکاری نظام متاثر ہونے کے کوئی شواہد نہیں ملے۔
تحقیقاتی ادارے کے مطابق پرتگال کی قومی ویب آرکائیو سروس ’آرکیوو ڈاٹ پی ٹی‘ نے لائبریری اینڈ آرکائیوز کینیڈا کی ’کلیکشن سرچ‘ سروس پر 899 درخواستیں ریکارڈ کیں، جن میں بعض بظاہر ابتدائی نوعیت کی ہیکنگ سے متلعق ناکام کوششیں بھی شامل تھیں۔
AI agents tried to hack a Canadian government website, research firm says https://t.co/GzB6chqrSM https://t.co/GzB6chqrSM
— Reuters (@Reuters) October 1, 2026
ٹرانس لوس نے کہا کہ مذکورہ سرگرمی میں استعمال ہونے والے طریقہ کار ان اے آئی ایجنٹس کی سابقہ سرگرمیوں سے مماثلت رکھتے ہیں جنہیں اسی عرصے میں اوپن اے آئی سے منسوب کیا گیا تھا۔
تاہم کمپنی نے واضح کیا کہ وہ موجودہ کوششوں کو یقینی طور پر اوپن اے آئی سے منسوب نہیں کرسکتی۔
کینیڈین سینٹر فار سائبر سکیورٹی نے بھی مشتبہ اے آئی ایجنٹ سرگرمی سے متعلق رپورٹس کا نوٹس لیا ہے۔
مزید پڑھیں: آسٹریلوی حکومتی ویب سائٹ ہیکنگ ہونے پر اوپن اے آئی کی معذرت
ادارے نے ایک بیان میں کہا کہ فی الحال ایسے کوئی شواہد موجود نہیں جن سے ظاہر ہو کہ حکومتی نظام متاثر یا ہیک ہوئے ہیں۔
دوسری جانب اوپن اے آئی نے کہا ہے کہ اسے کینیڈین حکومتی ویب سائٹس سے عوامی طور پر دستیاب معلومات تک رسائی حاصل کرنے کی کوشش کرنے والے اپنے ماڈلز سے متعلق رپورٹس کا علم ہے۔
ادارے کے ترجمان کے مطابق اوپن اے آئی ان نتائج کا جائزہ لے رہا ہے اور حکومت کی جانب سے جاری تحقیقات کرنے والے کینیڈین حکام کو ابتدائی بریفنگ بھی فراہم کرچکا ہے۔
مزید پڑھیں: تائیوان پر اے آئی سائبر حملہ، سرکاری ادارے نشانہ بن گئے
یہ واقعہ ایسے وقت سامنے آیا ہے جب دنیا بھر میں حکومتیں مصنوعی ذہانت کی تیز رفتار ترقی اور اس سے وابستہ سائبر سیکیورٹی خطرات سے نمٹنے کے لیے اقدامات کررہی ہیں۔
دنیا کی بڑی اے آئی کمپنیاں بھی طاقتور اے آئی ٹیکنالوجی کے ممکنہ خطرات سے خبردار کرتی رہی ہیں اور حکومتوں سے عالمی سطح پر تعاون کا مطالبہ کرتی ہیں۔
حالیہ عرصے میں اے آئی ایجنٹس کی سائبر سرگرمیوں سے متعلق متعدد واقعات سامنے آئے ہیں۔
مزید پڑھیں: اے آئی کی مدد سے سائبر جرائم میں تیزی، روسی ہیکرز کی نئی کارروائی کا انکشاف
گزشتہ ہفتے آسٹریلیا نے کہا تھا کہ جون میں ایک اوپن اے آئی ایجنٹ نے حکومتی صحت کے ڈیٹا پورٹل تک غیر مجاز رسائی حاصل کرکے فائلیں دیکھنے میں کامیابی حاصل کی تھی۔
اسے حکومتی ویب سائٹ ہیک کرنے والے اے آئی ایجنٹ کی ریکارڈ پر پہلی مثال قرار دیا گیا تھا۔
اوپن اے آئی نے منگل کو آسٹریلوی حکومتی ویب سائٹ تک غیر مجاز رسائی کے واقعے پر معذرت بھی کی تھی۔
