برطانیہ کی شہزادی کیٹ مڈلٹن نے انکشاف کیا ہے کہ مصروف دنوں میں وہ اکثر اپنا ہینڈ بیگ ساتھ لے جانا بھول جاتی ہیں، جبکہ اس سے قبل وہ اپنا موبائل فون بھی بار بار گم کرنے کی عادت کا ذکر کرچکی ہیں۔
شہزادی کیٹ نے یہ بات بدھ کے روز ویسٹ سسیکس میں واقع پل بورو منی بس کا دورہ کرتے ہوئے 94 سالہ اسٹیلا ڈریوٹ سے ملاقات کے دوران بتائی۔ کیٹ مڈلٹن نے اس موقع پر کمیونٹی ٹرانسپورٹ فراہم کرنے والے ادارے کی خدمات کا جائزہ لیا جو نقل و حرکت میں مشکلات کا سامنا کرنے والے افراد کی معاونت کرتا ہے۔
یہ بھی پڑھیں: شہزادی کیٹ مڈلٹن ایک بار پھر چھا گئیں، ومبلڈن میں سبز لباس نے ساری توجہ سمیٹ لی
دورے کے دوران شہزادی کیٹ منی بس میں سوار ہوئیں اور 94 سالہ اسٹیلا ڈریوٹ کو لینے گئیں، جن کے ساتھ بیٹھ کر انہوں نے خوشگوار گفتگو کی۔
گفتگو کے دوران کیٹ مڈلٹن نے مذاق کرتے ہوئے بتایا کہ وہ اس طرح کے دوروں کے دوران اپنا ہینڈ بیگ ساتھ لانا اکثر بھول جاتی ہیں۔ ان کے مطابق لوگ اکثر ان کے پیچھے بھاگتے ہوئے آواز لگاتے ہیں کہ آپ اپنا ہینڈ بیگ بھول گئی ہیں۔
شہزادی کیٹ اس سے قبل پوڈکاسٹ میزبان جیوانا فلیچر سے گفتگو میں اپنے موبائل فون کے حوالے سے بھی اسی طرح کی بھولنے کی عادت کا ذکر کرچکی ہیں، جیوانا فلیچر نے برطانوی اخبار دی ٹائمز کو بتایا تھا کہ کیٹ اپنے فون کا خیال رکھنے میں کافی خراب تھیں اور اکثر اپنا فون کہیں رکھ کر بھول جاتی تھیں۔
یہ بھی پڑھیں: برطانوی ولی عہد ولیم اور شہزادی کیٹ کا نیا گھر، ماہانہ کرایہ کتنا ہے؟
جیوانا فلیچر کے مطابق ایک سال کرسمس پر شہزادی کیٹ کو ملنے والے تمام تحائف بھی ان کے فون کو تلاش کرنے اور اسے گم ہونے سے بچانے سے متعلق تھے۔
شہزادی کیٹ نے جون 2026 میں دی کرسٹی این ایچ ایس فاؤنڈیشن ٹرسٹ کے دورے کے دوران کینسر کے علاج کے دوران پیش آنے والی ذہنی مشکلات کا بھی ذکر کیا تھا۔ انہوں نے بتایا تھا کہ اس عرصے میں انہیں پڑھنے اور کسی چیز پر توجہ مرکوز کرنے میں دشواری ہوتی تھی۔
کیٹ مڈلٹن نے ایک مریض سے گفتگو کے دوران بتایا تھا کہ رنگ بھرنے جیسی تخلیقی سرگرمیوں نے انہیں اس مشکل دور سے نمٹنے میں مدد دی، کیونکہ اس کے لیے کسی حتمی نتیجے یا مکمل تخلیق کی ضرورت نہیں تھی بلکہ یہ خود کو سرگرم رکھنے اور اس میں محو ہوجانے کا ایک طریقہ تھا۔
یہ بھی پڑھیں: شہزادہ ولیم اور کیٹ مڈلٹن کی 25 سالہ رفاقت، خصوصی جشن منانے کی تیاری
شہزادی کیٹ نے جنوری 2025 میں اعلان کیا تھا کہ وہ کینسر سے صحتیاب ہوچکی ہیں۔ اس سے چند ماہ قبل انہوں نے اپنے کینسر کی تشخیص کا اعلان کیا تھا اور علاج کے دوران دیکھ بھال کرنے پر رائل مارسڈن کا بھی شکریہ ادا کیا تھا۔
