فیصل آباد میں کھیلے گئے ٹرائی سیریز کے8ویں میچ میں سری لنکا نے پاکستان کو 6 وکٹوں سے شکست دے دی، پاکستان کو ایونٹ میں 5ویں ناکامی کا سامنا کرنا پڑا۔
اقبال اسٹیڈیم میں کھیلے گئے میچ میں پاکستان نے پہلے بیٹنگ کرتے ہوئے مقررہ 20 اوورز میں 8 وکٹوں کے نقصان پر 105 رنز بنائے۔ شاہر بانو 18 گیندوں پر 24 رنز بنا کر ناٹ آؤٹ رہیں، ان کی اننگز میں 2 چھکے شامل تھے، جبکہ اقصیٰ حبیب نے 20 اور روائل فرحان نے 14 رنز بنائے۔
یہ بھی پڑھیں: انڈر19 ویمنز ٹی20 سہ ملکی سیریز، سری لنکا نے پاکستان کو 9 وکٹوں سے شکست دے دی
سری لنکا کی جانب سے لیمنسا تھیلاکرَتنے نے عمدہ بولنگ کرتے ہوئے 14 رنز دے کر 3 وکٹیں حاصل کیں، یشالی جتھارا نے 2 کھلاڑیوں کو آؤٹ کیا۔
106 رنز کے ہدف کے تعاقب میں سری لنکا نے 13.3 اوورز میں 4 وکٹوں کے نقصان پر 109 رنز بنا کر کامیابی حاصل کرلی۔ اوپنر سنجنا کاوندی نے 28 گیندوں پر 46 رنز کی نمایاں اننگز کھیلی، جس میں 5 چوکے اور 2 چھکے شامل تھے۔ نیتھمی اوپیکشا نے 16 اور لیمَنسا نے ناقابل شکست 17 رنز بنائے۔
یہ بھی پڑھیں: انڈر 19 ویمنز ٹی 20 سہ ملکی سیریز: بنگلہ دیش نے پاکستان کو 13 رنز سے ہرا دیا
پاکستان کی جانب سے ماہ نور اور روزینہ اکرم نے ایک، ایک وکٹ حاصل کی۔
اس شکست کے بعد پاکستان کی انڈر 19 ویمنز ٹیم ٹرائی سیریز میں آگے بڑھنے کی دوڑ سے باہر ہوگئی۔ پاکستان کو ایونٹ میں اب تک صرف ایک کامیابی حاصل ہوئی تھی، جو 3 اکتوبر کو سری لنکا کے خلاف ملی تھی۔
