نائب وزیراعظم اور وزیر خارجہ اسحاق ڈار نے استنبول میں جرمنی کے وزیر خارجہ وہان واڈے فیہول سے ملاقات کی، جس میں پاکستان اور جرمنی کے تعلقات مزید مضبوط بنانے اور باہمی دلچسپی کے مختلف شعبوں میں تعاون بڑھانے پر تبادلہ خیال کیا گیا۔
یہ بھی پڑھیں: اسحاق ڈار کی مالدیپ کے صدر سے ملاقات، دوطرفہ تعاون بڑھانے پر اتفاق
ترجمان دفتر خارجہ کے مطابق ملاقات آر فور اور جرمنی، فرانس، اٹلی اور برطانیہ پر مشتمل ای فور کے وزارتی اجلاس کے موقع پر ہوئی۔
ملاقات میں دونوں وزرائے خارجہ نے علاقائی اور عالمی صورت حال پر بھی تبادلہ خیال کیا اور ابھرتے ہوئے علاقائی چیلنجز سے نمٹنے اور امن و استحکام کے فروغ کے لیے مذاکرات، سفارت کاری اور مسلسل عالمی رابطوں کی اہمیت پر زور دیا۔
یہ بھی پڑھیں: اسحاق ڈار اور مصری وزیر خارجہ کا رابطہ، علاقائی صورتحال پر تبادلہ خیال
اسحاق ڈار نے آر فور فریم ورک کے ساتھ جرمنی، فرانس، اٹلی اور برطانیہ کے تعمیری روابط کا خیرمقدم کیا اور مشترکہ تشویش کے امور پر مسلسل مشاورت اور سفارتی رابطہ کاری کی اہمیت اجاگر کی۔
ترجمان دفتر خارجہ کے مطابق دونوں رہنماؤں نے اس عزم کا اظہار کیا کہ مسلسل روابط اور مختلف شعبوں میں تعاون کے ذریعے پاکستان اور جرمنی کے دوطرفہ تعلقات کو مزید فروغ دیا جائے گا۔
