پنجاب کے شہر گوجرانوالہ میں شادی کی خوشیاں ماتم میں بدل گئیں، جہاں ولیمے کی تقریب میں شرکت کے لیے جانے والے دولہا دلہن کی گاڑی پر فائرنگ سے دلہن جاں بحق ہوگئی۔ مقتولہ کی شادی ایک روز قبل ہوئی تھی۔
میڈیا رپورٹ کے مطابق واقعہ گزشتہ رات سمن آباد چونگی کے قریب پیش آیا، جہاں نامعلوم ملزمان نے دولہا دلہن کی گاڑی کو فائرنگ کا نشانہ بنایا اور موقع سے فرار ہوگئے۔
یہ بھی پڑھیں:شادی کے چند ماہ بعد نئی نویلی دلہن قتل، شوہر اور گرل فرینڈ کی خوفناک سازش بے نقاب
پولیس کے مطابق مقتولہ کے والد کی مدعیت میں 2 نامزد ملزمان سمیت 3 افراد کے خلاف مقدمہ درج کرلیا گیا ہے۔ مقدمے میں لڑکی کی ایک دوست کو بھی نامزد کیا گیا ہے۔
پولیس کا کہنا ہے کہ مقدمے میں نامزد ایک ملزم مقتولہ سے شادی کرنا چاہتا تھا، تاہم لڑکی کے اہل خانہ نے اس رشتے سے انکار کردیا تھا۔ نامزد خاتون ملزمہ، مقتولہ کی دوست ہونے کے ساتھ اس ملزم کی رشتے دار بھی ہے۔
پولیس نے واقعے کی مزید تحقیقات شروع کردی ہیں اور ملزمان کی تلاش جاری ہے۔
