پولیس نے پیر کی شب گجرات میں سابق وزیر اعلٰی پنجاب چوہدری پرویز الہٰی کے گھر چھاپہ مارا کر انکے دو ملازمین کو حراست میں لے لیا ہے۔ پولیس اہلکار سابق وزیر اعلیٰ کی رہائش گاہ کنجاہ ہاؤس کا کچھ دیر محاصرہ کرنے کے بعد واپس روانہ ہوگئے۔
چوہدری پرویز الہٰی نے اپنی رہائش گاہ پر پولیس چھاپے کی تصدیق کی ہے جبکہ انکے صاحبزادے مونس الہٰی نے گھر کے باہر پولیس پہنچنے کی ویڈیو ٹوئٹر پر شیئر کرتے ہوئے لکھا ہے کہ ہمارے گھر پر چھاپہ مار کر آپ کو لگتا ہے کہ ہم عمران خان کو چھوڑ دیں گے؟ دوبارہ سوچ لیں۔
Police , Fia, and others again at Kunjah House . They keep raiding without warrant. By raiding our house you think you will make us leave @ImranKhanPTI . Think again!! pic.twitter.com/eumfhL0BaA
— Moonis Elahi (@MoonisElahi6) February 6, 2023
اس سے قبل یکم فروری کو بھی پولیس نے پرویز الٰہی کی گجرات میں رہائش گاہ پر چھاپہ مارا تھا۔ خاندانی ذرائع کے مطابق دونوں مرتبہ پرویز الہٰی یا انکے انکے اہل خانہ میں سے کوئی بھی فرد رہائش گاہ پر موجود نہیں تھا۔
پولیس ذرائع کے مطابق پرویز الہی کی رہائش گاہ پر چھاپہ وجاہت حسین اور انکے بیٹے موسٰی الہی کی گرفتاری کیلئے مارا گیا تھا۔ جن کیخلاف دو مقدمات گجرات کے تھانہ ککرالی اور کڑیانوالہ میں درج ہیں۔
میڈیا رپورٹس کے مطابق پولیس نے پرویز الہی کی رہائش گاہ کی تلاشی کے دوران جہاں کئی کاغذات اور فائلیں اپنے قبضہ میں لی ہیں وہیں دو ملازمین کو بھی حراست میں لیا گیا ہے۔
