اسرائیلی پولیس نے وزیر اعظم بنیامن نتن یاہو کی لیکوڈ پارٹی کی جانب سے عرب جماعتوں پر انتخابات میں دھاندلی کے الزامات کو مسترد کر دیا ہے، جبکہ ‘ڈبل لفافہ’ (خاص ووٹرز کے) ووٹوں کی گنتی کا عمل جاری ہے۔
اسرائیلی پولیس نے وزیر اعظم بنیامن نتن یاہو کی سیاسی جماعت ‘لیکوڈ پارٹی’ کے ان دعوؤں کو یکسر مسترد کر دیا ہے جن میں کہا گیا تھا کہ عرب جماعتوں نے انتخابات ’چوری‘ کر لیے ہیں۔ یہ پیشرفت ایک ایسے وقت میں سامنے آئی ہے جب ملک میں ‘ڈبل لفافہ’ ووٹوں کی گنتی کا عمل ابھی جاری ہے۔
یہ بھی پڑھیے اسرائیلی انتخابات: نیتن یاہو کی برتری کام نہ آسکی، حکومت سازی کا معاملہ الجھ گیا
اسرائیل میں مقامی عبرانی زبان کے میڈیا کو معلومات فراہم کرتے ہوئے پولیس کے ایک اعلیٰ ذریعے نے بتایا ’پچھلے انتخابات کے مقابلے میں بھی اس بار الیکشن کا دن انتخابی شفافیت سے متعلق انتہائی کم غیر معمولی واقعات کے ساتھ پرامن انداز میں گزرا۔‘
پولیس نے اس بات پر بھی زور دیا کہ لیکوڈ پارٹی کی جانب سے لگائے گئے الزامات کی حمایت کے لیے کسی بھی قسم کے تحقیقاتی یا انٹیلی جنس شواہد موجود نہیں ہیں۔
واضح رہے کہ پولیس سے قبل مرکزی الیکشن کمیٹی (سی ای سی) کے ایک سینئر اہلکار نے بھی دھاندلی کے ان الزامات کو یکسر مسترد کر دیا تھا۔
ووٹوں کی جاری گنتی کے دوران، منگل کے روز ہونے والے انتخابات میں عرب کمیونٹی کی بے مثال اور تاریخی شرکت دیکھنے میں آئی، جس کے نتیجے میں عرب جماعتوں نے 19 نشستوں پر تاریخی کامیابی حاصل کی ہے۔
مزید پڑھیں:اسرائیلی انتخابات: عرب جماعتوں کی 18 نشستیں حکومت سازی میں فیصلہ کن کردار ادا کرسکتی ہیں
عبرانی میڈیا کی رپورٹس کے مطابق، پولنگ سے قبل ہی یہ خبریں سامنے آ رہی تھیں کہ اگر نتن یاہو کو واضح اکثریت نہ ملی تو لیکوڈ پارٹی نے عرب اکثریتی علاقوں کے نتائج کو چیلنج کرنے اور انتخابات کو ’چوری شدہ‘ قرار دینے کا پہلے سے ہی منصوبہ بنا رکھا تھا، جس کے لیے متعدد شکایات اور الزامات کا مسودہ پہلے سے تیار کیا گیا تھا۔
