فیلڈ مارشل صلح کے پیامبر بن کر تہران گئے، آنے والے دنوں یا ہفتوں میں امن کی صورتحال مزید واضح ہوسکتی ہے، خواجہ آصف

وزیر دفاع خواجہ آصف نے کہا ہے کہ تہران میں کوئی دفاعی معاہدہ نہیں ہو رہا تھا بلکہ فیلڈ مارشل عاصم منیر خطے میں امن قائم کرنے اور فریقین کے درمیان صلح کی راہ ہموار کرنے کے لیے گئے تھے۔ انہوں نے سیاسی اختلافات سے بالاتر ہوکر عالمی سطح پر پاکستان اور فیلڈ مارشل کے کردار کو تسلیم کرنے کی ضرورت پر بھی زور دیا۔

قومی اسمبلی میں اظہار خیال کرتے ہوئے خواجہ آصف نے کہا کہ تہران میں پاکستان کے دفاع یا کسی دفاعی معاہدے سے متعلق بات چیت نہیں ہورہی تھی۔ ان کے مطابق فیلڈ مارشل عاصم منیر نے خطے میں امن کے لیے ثالثی کا کردار ادا کیا اور ممکنہ کشیدگی کو کم کرنے کی کوشش کی۔ انہوں نے کہا کہ آنے والے دنوں یا ہفتوں میں امن کی صورت حال مزید واضح ہوسکتی ہے۔

وزیر دفاع نے کہا کہ پاکستان اور سعودی عرب کے درمیان دفاعی معاہدہ پہلے ہی ہوچکا ہے، جبکہ قطر، ترکیہ، پاکستان اور انڈونیشیا کے درمیان بھی دفاعی معاہدوں سے متعلق پیشرفت ہوچکی ہے۔ تاہم تہران میں ہونے والی سرگرمیاں وزارت دفاع کے دائرہ اختیار میں نہیں آتی تھیں۔

مولانا اپنا ماضی بھلا کر مخالفین کو نشانہ بناتے ہیں، لیکن کم از کم مجھ میں اتنی اخلاقی جرأت نہیں۔ میں جب بولتا ہوں تو مجھے اپنا ماضی صاف نظر آتا ہے اور خیال آتا ہے کہ کہیں مجھے طعنہ تو نہیں ملے گا؟ وزیر دفاع خواجہ آصف pic.twitter.com/HfC9Y7Jd3Y

— WE News (@WENewsPk) October 29, 2026

خواجہ آصف نے مولانا فضل الرحمان کا ذکر کرتے ہوئے کہا کہ ان کا ملک کی سیاسی تاریخ میں ایک مقام ہے اور ان کے والد بھی ایک اہم شخصیت تھے۔ انہوں نے کہا کہ سیاسی اختلافات اپنی جگہ، لیکن ملکی قیادت کو بین الاقوامی سطح پر پاکستان کے کردار اور فیلڈ مارشل کی کوششوں کا اعتراف کرنا چاہیے۔

انہوں نے کہا کہ سیاسی جماعتوں کو اختلافات کے باوجود ایک دوسرے کے لیے وسیع القلبی اور وقار کا مظاہرہ کرنا چاہیے۔ ان کے بقول ماضی میں مختلف جماعتیں ایک دوسرے کے ساتھ حکومتوں میں شامل رہی ہیں اور سیاسی تعاون بھی کرتی رہی ہیں، اس لیے اختلافات کو اس انداز میں بیان نہیں کرنا چاہیے کہ باہمی احترام متاثر ہو۔

یہ بھی پڑھیں:نئے صوبوں یا انتظامی یونٹس کے قیام کی کہیں سے مخالفت نہیں ہونی چاہیے، یہ قومی مسئلہ ہے، وزیر دفاع خواجہ آصف

وزیر دفاع نے اپنے ماضی کے فوجی حکمرانی سے متعلق مؤقف کا حوالہ دیتے ہوئے کہا کہ ان کی 2004 کی تقریر کو اس وقت کے سیاسی اور آئینی پس منظر میں دیکھا جانا چاہیے۔ انہوں نے کہا کہ موجودہ پارلیمنٹ انتخابی عمل کے نتیجے میں وجود میں آئی ہے اور انتخابات پر اعتراضات جمہوری عمل کا حصہ ہیں، تاہم سیاسی اختلافات کے باوجود پارلیمانی نظام اور قومی مفاد کو اہمیت دینی چاہیے۔