کہا تھا عمران خان بیرونی ایجنٹ ہے، اب حقائق سامنے آ رہے ہیں: فضل الرحمان

پاکستان ڈیموکریٹک موومنٹ (پی ڈی ایم) کے سربراہ مولانا فضل الرحمان نے کہا ہے کہ چیئرمین پی ٹی آئی عمران خان کے خلاف حقائق سامنے آ رہے ہیں۔

بدھ کو پریس کانفرنس کرتے ہوئے انہوں نے کہا کہ چیئرمین پی ٹی آئی کے بارے میں کہا تھا کہ یہ بیرونی ایجنٹ ہے اور اس کے یہودی لابی سے رابطے ہیں۔

انہوں نے کہا کہ 75 سال میں پہلی بار اسرائیل نے پاکستان پر ناجائز تنقید کی اور کہا گیا کہ پی ٹی آئی کے لوگوں کی گرفتاریاں درست نہیں، پی ٹی آئی چیئرمین کو بھارت سمیت بعض عالمی طاقتوں کی مالی مدد بھی حاصل رہی۔

مولانا فضل الرحمان نے کہا کہ چورن بیچا گیا کہ امریکا نے عمران خان کے خلاف سازش کی ہے، اب اس کا اپنا پرنسپل سیکریٹری کہہ رہا ہے کہ سائفر کے نام پر ڈرامہ کیا گیا، اب ان حقائق کو جھٹلایا نہیں جا سکتا۔

انہوں نے کہا کہ میرا فرض ہے کہ قوم کو حقائق سے آگاہ کروں، چیئرمین پی ٹی آئی وہ شخص ہے جس نے اپنے ہی لوگوں کے بارے میں کہا کہ ان پر جنسی تشدد ہوا ہے۔

سربراہ جے یو آئی نے کہا کہ جمعیت علمائے اسلام ملک بھر سے انتخابات میں بھرپور حصہ لے گی اور ہر سیٹ پر اپنا امیدوار لائیں گے۔ اگر ایڈجسٹمنٹ کی ضرورت ہوئی تو اضلاع کی سطح پر کریں گے۔