خیبرپختونخوا حکومت کے ہیلی کاپٹرز استعمال کرنے پر چیئرمین پی ٹی آئی عمران خان اور پارٹی کے دیگر رہنماؤں سے ریکوری کے لیے الیکشن کمیشن نے قومی احتساب بیورو (نیب) کو خط لکھ دیا۔
میڈیا رپورٹ کے مطابق نیب کو لکھے گئے خط میں کہا گیا ہے کہ عمران خان اور دیگر غیر متعلقہ افراد کو فورم سے نادہندہ قرار دیتے ہوئے ان کی فہرست الیکشن کمیشن کو فراہم کی جائے۔ قانون کے مطابق مزید کارروائی کے لیے نادہندگان کی فہرست ریٹرنگ افسران کو بھیجی جائے گی۔
نیب دستاویز کے مطابق خیبرپختونخوا حکومت کے دو سرکاری ہیلی کاپٹرز میں 1800 غیر قانونی سفر کیے گئے۔ سیاست دانوں نے 588، سرکاری اہلکاروں نے 577 بار ہیلی کاپٹرز کو استعمال کیا۔
الیکشن کمیشن کے لکھے گئے خط میں بتایا گیا ہے کہ خیبر پختونخوا حکومت کا ہیلی کاپٹر استعمال کرنے والے غیر مجاز افراد کے خلاف 19 کروڑ 83 لاکھ روپے اور سیاست دانوں کے ذمہ 9 کروڑ 68 لاکھ روپے سے زائد بقایاجات ہیں جبکہ سرکاری اہلکاروں پر 5 کروڑ 8 لاکھ روپے سے زیادہ کی رقم واجب الادا ہے۔ دیگر افراد کے ذمہ 5 کروڑ روپے سے زائد بقایاجات ہیں۔
