وفاقی وزیر داخلہ رانا ثنا اللہ کا کہنا ہے کہ حکومت نے تحریک انصاف کے سینیٹر شوکت ترین کی گرفتاری کی اجازت دے دی ہے۔
وفاقی تحقیقاتی ادراہ نے گزشتہ روز سابق وزیر خزانہ شوکت ترین کی صوبائی وزرا سے آئی ایم ایف سے حکومتی مذاکرات سبو تاژ کرنے کے الزام کی تحقیقات مکمل کرتے ہوئے وزیر داخلہ سے انکی گرفتاری کی اجازت طلب کی تھی۔
کراچی میں میڈیا سے گفتگو کرتے ہوئے وزیر داخلہ رانا ثنا اللہ کا کہنا تھا کہ شوکت ترین عمران خان کے بہکاوے میں آگئے تھے۔ انہوں نے جو کیا انہیں اس کی سزا ملے گی۔ شیخ رشید نے ایک بڑٰ جماعت کے سربراہ پر قتل کا الزام عائد کیا۔ ان کی گرفتاری کے پیچھے انکی بکواس ہے۔ عدالت بھی مانتی ہے کہ انکے خلاف مقدمہ بنتا ہے۔
وزیر داخلہ کا کہنا تھا کہ عمران خان نے ملک کے خلاف گھٹیا پروپیگنڈا کیا۔ عوام نے عمران خان کو مسترد کردیا ہے۔ وہ ایک سیاسی دہشت گرد بن چکے ہیں۔ ملک کو درپیش معاشی اور دہشت گردی کے چیلنجز کا حل الیکشن نہیں۔ قومی اسمبلی آئین کے مطابق اپنی مدت پوری کرے گی۔
وفاقی وزیر داخلہ رانا ثنا اللہ کا کہنا تھا کہ پاکستان کو ڈیفالٹ سے بچانے کیلئے عمران خان کو وقت سے پہلے فارغ کیا گیا۔ پہلے مسلم لیگ ن اور پیپلزپارتی ایک دوسرے کیخلاف باتیں کرتے تھے مگر اب ہمیں سمجھ آگئی ہے کہ اصل چور عمران خان ہے۔ جنہوں نے توشہ جانہ میں چوری کی ہے۔
