پاک بحریہ کی کثیرالملکی میری ٹائم مشق امن 23 کی اختتامی تقریب شمالی بحیرہ عرب میں منعقد کی گئی۔
وزیراعظم پاکستان میاں شہباز شریف تقریب کے مہمان خصوصی تھے. وفاقی وزیر برائے تعلیم اور پیشہ وارانہ تربیت رانا تنویر، سیکٹری دفاع، گورنر سندھ اور وزیر اعلی سندھ بھی تقریب میں شریک تھے۔
مشق امن 23 کی اختتامی تقریب میں چیئرمین جوائنٹ چیفس آف اسٹاف اور سروسز چیفس نے بھی شرکت کی۔ بحیرہ عرب میں موجود پاک بحریہ کے جہاز پر آمد پر امیر البحر نے وزیر اعظم شہباز شریف کا استقبال کیا۔
ترجمان پاک بحریہ کے مطابق وزیراعظم پاکستان کو امن مشقوں کے حوالے سے بریفنگ بھی دی گئی۔ مشق میں شریک ممالک کے بحری اور ہوائی جہازوں نے مہمان خصوصی کو سلامی پیش کی۔
ہر دو سال بعد پاک بحریہ کی میزبانی میں منعقد ہونیوالی اس امن مشق کا مقصد سمندروں کو مثبت انسانی سرگرمیوں کے لیے محفوظ بنانے کے عزم کا اظہار کرنا ہے جس میں علاقائی اور عالمی بحری افواج کو مدعو کیا جاتا ہے۔
آٹھویں کثیر الملکی میری ٹائم مشق امن چھ روز تک جاری رہی جس میں 50 سے زائد ممالک نے شرکت کی۔
