نگراں وزیراعلیٰ پنجاب محسن نقوی نے کہا ہے کہ سانحہ جڑانوالہ کی ویڈیوز اور دیگر شواہد مل گئے ہیں جن کی مدد سے شرپسندوں کو جلد گرفتار کرکے قانون کے کٹہرے میں لایا جائے گا۔
وزیراعلیٰ آفس میں جمعے کو ملاقات کے لیے آنے والے مسیحی برادری کے رہنماؤں کے نمائندہ وفد سے گفتگو کرتے ہوئے محسن نقوی نے کہا کہ انہوں نے مزید کہا کہ سانحے کے ذمہ دار قانون سے نہیں بچ سکیں گے اور حکومت ان تمام عناصر کو کیفرکردار تک پہنچانے کے لیے کوئی دقیقہ فروگزاشت نہیں کرے گی۔
جڑانوالہ واقعے کی ایک بار پھر شدید مذمت کرتے ہوئے کہا کہ قائداعظم کے پاکستان میں جڑانوالہ جیسے افسوسناک واقعات کی کوئی گنجائش نہیں ہے۔
نگراں وزیراعلیٰ نے کہا کہ سب کے ساتھ مل کر ایسے واقعات کی روک تھام کے لیے ایک جامع پالیسی مرتب کی جائے گی۔
انہوں نے کہا کہ مسیحی برادری کے جان ومال کا تحفظ ہماری ذمہ داری ہے اور ہم اس دلخراش واقعے کو کبھی بھول نہیں سکتے۔
نگراں وزیراعلیٰ نے کہا کہ پوری کوشش ہے کہ گرجا گھروں کو جلدازجلد اصل حالت میں بحال کیا جائے جب کہ تباہ ہونے والے گھروں کے نقصان کا تخمینہ بھی لگایا جارہا ہے اور متاثرہ خاندانوں کو مالی امداد دی جائے گی۔
تعلیمی نصاب میں رواداری کاعوامی شعور بیدار کرنے کیلئے ترامیم ضروری ہیں۔انہوں نے کہا کہ تمام مکاتب فکر کے علماء کرام نے جڑانوالہ واقعات کی بھرپور مذمت کی۔کرسچین خاندانوں کے تحفظ اور گرجا گھروں کی بحالی کے لئے تمام ممکنہ اقدامات کئے جائیں گے۔ملک ہمارا ہے،جڑانوالہ واقعہ کی صورت میں جو دھبہ لگا اس کو مل کر مٹانا ہے۔
آئی جی پنجاب اور ایڈیشنل چیف سیکریٹری داخلہ نے جڑانوالہ کے واقعہ کے بارے میں تفصیلی بریفنگ دی۔ اس موقع پر اقلیتی رہنماؤں نے جڑانوالہ واقعات کے حوالے سے اظہار خیال کیا۔
وفد میں سینیٹر کامران مائیکل،بشپ آزاد مارشل،سابق ایم پی اے شکیل مارکس کھوکھر، شہزاد گل،پاسٹرجمیل ناصر،کرنل میکڈونلڈ چندی،پاسٹر انور فضل،پاسٹر وسیم اللہ کھوکھر،بشپ سبسٹین شاہ اوردیگر شامل تھے۔ اس موقع پر سیکریٹری اوقاف،سیکریٹری انسانی حقوق واقلیتی امور اور ڈائریکٹر انفارمیشن پنجاب ندیم رضا سمیت دیگر متعلقہ حکام بھی موجود تھے۔
