وفاقی حکومت کی منظوری کے بعد رفعت مختار کو غلام نبی میمن کی جگہ انسپکٹر جنرل ( آئی جی) سندھ تعینات کر دیا گیا ہے، جب کہ غلام نبی میمن کو اسٹیبلشمنٹ ڈیپارٹمنٹ میں رپورٹ کرنے کی ہدایت کی گئی ہے۔
وفاقی حکومت کی جانب سے جاری نوٹیفکیشن کے مطابق، وفاقی حکومت نے پولیس سروس آف پاکستان کے گریڈ 21 کے افسر رفعت مختار کو سروسز ایکٹ 1973 کے تحت انسپکٹر جنرل سندھ پولیس تعینات کرنے کی منظوری دی ہے۔ وفاقی حکومت نے منظوری کے بعد نوٹیفکیشن بھی جاری کردیا ہے۔
نوٹیفکیشن کے مطابق پروونشل پولیس آفیسر(پی پی اُو) تعینات رفعت مختار صوبہ پنجاب میں اپنی خدمات سرانجام دے رہے تھے، جن کا پنجاب سے تبادلہ کر کے اب انہیں کراچی میں انسپکٹر جنرل آف پولیس غلام نبی میمن کی جگہ تعینات کرنے کے احکامات جاری کیے گئے ہیں۔
جب کہ صوبہ سندھ میں انسپیکٹر جنرل آف پولیس (آئی جی) کے عہدے پر خدمات سر انجام دینے والے غلام نبی میمن جو ان دنوں چھٹیوں پرہیں اور عمرے کی ادائیگی کے لیے مکہ مکرمہ گئے ہوئے ہیں کو وفاقی حکومت کی طرف سے ہدایت کی گئی ہے کہ وہ نئے احکامات ملنے تک اسٹیبلشمنٹ ڈیپارٹمنٹ میں رپورٹ کریں۔
