سری لنکا میں افغانستان کے خلاف 3 ایک روزہ میچوں کی سیریز میں کلین سوئپ حاصل کرنے کے بعد قومی کرکٹ ٹیم کے کپتان بابر اعظم گھر واپس پہنچ گئے جہاں گھر والوں کی جانب سے انہیں سرپرائز دیا گیا۔
قومی کرکٹ ٹیم کے کپتان بابر اعظم کی گھر واپسی سے متعلق ان کے بھائی فیصل اعظم نے اپنے یوٹیوب چینل پر ایک ویڈیو اپ لوڈ کی اور اس میں پورے سفر کو دکھایا گیا۔
ویڈیو میں بابر اعظم اپنے بھائی فیصل اعظم کو بتا رہے ہیں کہ سری لنکا میں ان کو بہت پیار ملا جس کی وہ توقع نہیں کر رہے تھے۔ بابر اعظم نے بتایا کہ انہیں وہاں بہت سپورٹ ملی جسے دیکھ کر کافی حیرانی ہوئی۔
ایئرپورٹ سے واپسی پر گاڑی میں بنی ویڈیو میں فیصل اعظم نے اپنے بھائی سفیر اعظم سے پوچھا کہ بھائی اب سیریز جیت کر واپس آگئے اور سیریز کی جیت کے بعد قومی ٹیم نمبر ون پر آچکی ہے اور بھائی بھی نمبر ون بیٹسمین ہیں، تو کیا ان کو وہ سرپرائز بتادیں جو گھر والے انہیں دے رہے ہیں؟
مزید پڑھیں
جس پر سفیر اعظم کہتے ہیں کہ ابھی نہیں کچھ دیر بعد کرلیتے ہیں۔ اس بات کو سن کر بابر اعظم نے خوشی کا اظہار کرتے ہوئے کہا کہ ’مجھے پہلی بار تحفہ ملے گا کوئی‘۔
اس کے بعد فیصل اعظم نے گھر جانے کے بجائے گاڑی کا رخ بابر اعظم کے نئے تعمیر ہونے والے گھر کی طرف کیا اور کہا کہ ابھی ہم اپنے گھر نہیں جائیں گے بلکہ بھائی (بابر اعظم ) کے زیرِ تعمیر نئے گھر میں جائیں گے۔
زیرِ تعمیر گھر کے معائنے کے بعد تینوں بھائی واپس اپنے آبائی گھر کی طرف چل دیے اور راستے میں فیصل اعظم بابر اعظم سے پوچھتے ہیں کہ آپ کو اپنے نئے گھر کا ڈیزائن پسند آرہا ہے تو بابر اعظم کہتے ہیں کہ میں جب بھی کچھ عرصے بعد یہاں آتا ہوں تو یہ ادھر کا ادھر ہی کھڑا ہوتا ہے۔
واپس گھر پہنچنے پر فیصل اعظم نے بتایا کہ فیملی کی طرف سے بابر اعظم کو ایک گاڑی تحفے میں دی جا رہی ہے جس کے بارے میں بابر اعظم کو ابھی معلوم نہیں تھا۔ فیصل اعظم نے ویڈیو میں یہ تو بتادیا کہ بابر اعظم کو گاڑی دی جارہی ہے لیکن یہ گاڑی کون سی ہے اس بارے میں اگلی ویڈیو میں بتایا جائے گا۔
ویڈیو میں یہ بھی دیکھا گیا کہ بابر اعظم نے گھر پہنچنے پر سب سے پہلے اپنی بھتیجیوں کو اٹھایا اور ان کو پیار کیا۔
