پاکستان تحریک انصاف پارلیمنٹیرینز کے سربراہ پرویز خٹک نے کہا ہے کہ تحریک انصاف نے ساڑھے 3 سالہ دور میں ملک کے لیے کچھ نہیں کیا۔ عمران خان فرعون کا روپ دھار چکے تھے، وہ ملک کے تاحیات حکمران اور بادشاہ بننا چاہتے تھے۔
کاغان میں جلسے سے خطاب کرتے ہوئے پرویز خٹک نے کہاکہ میں عمران خان سے لڑتا رہا مگر وہ ان کی کام کرنے کی نیت نہیں تھی۔ ہماری مرکز اور صوبے میں حکومت رہی مگر افسوس کہ ہم نیا پاکستان نہ بنا سکے۔
پاکستان تحریک انصاف پارلیمنٹیرینز نے نوشہرہ کے بعد کاغان میں جلسہ کیا ہے، اس موقع پر چیف آف کاغان سید مزمل شاہ اپنے بیٹے سابق صوبائی وزیر سید احمد شاہ، خاندان اور علاقہ کے لوگوں سمیت پاکستان تحریک انصاف پارلیمنٹیرینز میں شامل ہوگئے۔
مزید پڑھیں
پرویز خٹک نے عمران خان پر تنقید کرتے ہوئے کہا کہ فرعون ذہنیت والا شخص کہتا تھا جس کو جی کرتا ہے چلا جائے فرق نہیں پڑتا۔ انہوں نے عمران خان کو چیلنج کرتے ہوئے کہاکہ یہ صوبہ اب آپ کو چھوڑ کر جا رہا ہے، روک سکتے ہو تو روک لو۔
پرویز خٹک نے کہاکہ ہم نے نئی پارٹی بنائی ہے، اس کا اپنا نعرہ اور منشور ہے جس کو صوبے سمیت پورے پاکستان تک پہچائیں گے۔ نوشہرہ سے شروع ہونے والا سفر اب رکے گا نہیں۔
سابق وزیراعلیٰ نے کہاکہ کاغان ناران سیاحتی مرکز ہیں، پورے ملک سے لوگ یہاں آتے ہیں، اس لیے یہاں کے مقامی لوگوں پر ’کے ڈی اے‘ کے جانب سے بے جا ٹیکس ختم کروں گا۔
انہوں نے کہاکہ میں موجودہ بلدیاتی نظام کے خلاف تھا، ہم اقتدار میں آکر بلدیاتی نظام کو بہتر کریں گے۔ بیوروکریسی کو عوام کا خادم بننا پڑے گا اس لیے یہ خود کو بادشاہ نا سمجھے، ’ٹھیک طریقے سے اپنا کام کرے ورنہ مجھے ٹھیک کرنا آتا ہے‘۔
ہمارا نعرہ امن، ترقی اور خوشحالی ہے، محمود خان
اس موقع پر محمود خان نے کہاکہ ہمارا نعرہ امن، ترقی اور خوشحالی ہے، ملک میں امن ہوگا تو ترقی آئے گی اور ترقی سے پوری قوم خوشحال ہوگی۔
واضح رہے کہ پرویز خٹک پی ٹی آئی کے پلیٹ فارم سے وزیراعلیٰ خیبرپختونخوا رہے، اس کے علاوہ عمران خان کی کابینہ میں وزیر دفاع کی ذمہ داریاں نبھائیں۔
پرویز خٹک کا شمار عمران خان کے قریبی ساتھیوں ہوا کرتا تھا مگر سانحہ 9 مئی کے بعد انہوں نے تحریک انصاف سے علیحدگی اختیار کر لی تھی۔