ترکیہ کے صدر رجب طیب ایردوان نے آج انقرہ کے صدارتی کمپلیکس میں وزیراعظم محمد شہباز شریف کا استقبال کیا.
ون آن ون اور وفود کی سطح پر ہونے والی بات چیت کے دوران وزیراعظم نے تباہ کن زلزلے کے نتیجے میں ہزاروں قیمتی جانوں اور بنیادی ڈھانچے کو پہنچنے والے نقصان پر صدر ایردوان اور ترکیہ کی قوم سے دلی تعزیت کا اظہار کیا۔
پاکستان اور ترکیہ کے درمیان برادرانہ تعلقات کا ذکر کرتے ہوئے وزیر اعظم نے کہا کہ پاکستانی عوام نے اپنے ترک بھائیوں اور بہنوں کے طرح درد اور کرب کو محسوس کیا ہے۔
پاکستان کے عوام اس وقت تک آرام سے نہیں بیٹھیں گے جب تک زلزلہ سے متاثرہ علاقوں میں آخری شخص کی مکمل بحالی نہیں ہو جاتی۔
صدر ایردوان نے تباہ کن زلزلے کے تناظر میں ترکیہ کے لیے پاکستان کی مدد اور حمایت پر وزیراعظم کا شکریہ ادا کیا۔
انہوں نے اس بات کا اعادہ کیا کہ ترکیہ کی قوم اس قدرتی آفت کے نتیجے میں ہونے والی تباہی سے مزید مضبوط اور پر عزم ہو کر ابھرے گی۔
وزیر اعظم ترکیہ میں آنے والے شدید زلزلے کے تناظر میں پاکستان کی یکجہتی اور حمایت کے اظہار کے لیے ترکیہ کا دورہ کر رہے ہیں۔
وزیراعظم زلزلے سے متاثرہ علاقوں کا دورہ بھی کریں گے اور وہاں موجود پاکستانی ریسکیو اور ریکوری ٹیموں سے ملاقات کریں گے۔
وزیر اعظم کے ہمراہ وفاقی وزیر اطلاعات و نشریات محترمہ مریم اورنگزیب، وزیر اعظم کے معاون خصوصی جناب طارق فاطمی اور چیئرمین این ڈی ایم اے لیفٹیننٹ جنرل انعام حیدر ملک بھی تھے۔
