ڈیرہ بگٹی سے سبی جانے والے فٹبال ٹیم کے 6 کھلاڑیوں کو مسلح ڈاکوؤں نے اغوا کر لیا ہے۔ فٹبال ٹیم کے کھلاڑیوں کو جانو بٹی کے علاقے میں گاڑی سے اتار کر اغوا کیا گیا۔
لیویز حکام کے مطابق اغوا ہونے والوں میں عامر ولد ذاکر حسین، فیصل ولد حنیف سہیل، احمد ولد عمر بخش، یاسر ولد امیر بخش، شیراز ولد داد محمد اور بابر ولد ڈوٹا شامل ہیں۔
فٹبال ٹیم میں 18 نوجوان شامل تھے جو وزیراعلیٰ گولڈ کپ ٹورنامنٹ کھیلنے جا رہے تھے۔ لیویز اور سیکیورٹی اداروں نے اغوا ہونے والے کھلاڑیوں کی تلاش شروع کر دی ہے۔
وزیراعلیٰ بلوچستان نے واقعہ کا نوٹس لے لیا
نگراں وزیراعلیٰ بلوچستان میر علی مردان ڈومکی کا ڈیرہ بگٹی کے علاقے جانی بیٹی سے 6 فٹبالرز کے اغوا کے واقعہ کا نوٹس لیتے ہوئے کمشنر سبی سے واقعہ کی رپورٹ طلب کر لی ہے۔
علاوہ ازیں وزیراعلیٰ نے مغوی کھلاڑیوں کی بحفاظت واپسی کے لیے تمام وسائل بروئے کار لانے کی ہدایت کی ہے۔ انہوں نے کہا کہ کھلاڑیوں کی بازیابی کو یقینی بنانے کے لیۓ مربوط کوششیں کی جائیں۔
مزید پڑھیں
وزیراعلیٰ نے ہدایت کی ہے کہ صورتحال کے مطابق ایف سی کی معاونت بھی حاصل کی جائے۔ انہوں نے کہا ہے کہ کھلاڑی ہمارا سرمایہ ہیں ان کی سلامتی اولین ترجیح ہے۔
وزیر اعلیٰ نے ہدایات دی ہیں کہ ایف سی، لیویز اور پولیس پر مشتمل ٹیمیں تشکیل دی جائیں۔
وزیراعلیٰ کی ہدایت پر ایڈیشنل چیف سیکریٹری داخلہ کو کھلاڑیوں کی بازیابی کی کارروائی کے لیے فوکل پرسن مقرر کر دیا گیا ہے۔
علاوہ ازیں صوبائی وزیر کھیل نوابزادہ جمال رئیسانی نے ڈپٹی کمشنر سے رابطہ کیا ہے اور کھلاڑیوں کی فوری بازیابی کی ہدایت کی ہے۔
