پشاور پولیس لائن کے بعد کراچی پولیس مرکز میں بھی دہشت گردی کے بعد پورے ملک میں ہائی الرٹ جاری کردیا گیا ہے
ریلوے پولیس نے تمام ریلوے اسٹیشنز، پلیٹ فارمز اور ٹرینوں کی سکیورٹی بڑھا دی ہے ۔
آئی جی ریلوے کے احکامات کی روشنی میں تمام ڈویژنز کے ایس پیز کو فول پروف سیکیورٹی فراہم کرنے کی ہدایت کردی گئی ہے۔ اسٹیشنز کے داخلی اور خارجی راستوں کی چیکنگ مزید بڑھادی گئی۔
ریلوے اسٹیشنزاور ٹرینوں کو بم ڈسپوزل سکواڈ اور سپیشل برانچ کے ذریعے سرچ اور کلیئر کیا جا رہا ہے۔ اسی طرح غیر ضروری نقل و حرکت پر کڑی نظر رکھی جا رہی ہے۔ بالخصوص ٹرینوں کے واش رومز اور حساس جگہوں کی تلاشی کو یقینی بنایا جا رہا ہے ۔
پولیس ذرائع کے مطابق ڈیوٹی پر مامور ملازمین کو الرٹ اور چوکنا ہوکر ڈیوٹی سرانجام دینے کے سخت احکامات جاری کئے گئے ہیں۔
سینٹرل پولیس آفس ریلوے کے احکامات پر تمام ایس پیز نے ریلوے اسٹیشنز کی سیکیورٹی کو مزید سخت کر دیا ہے۔
