پاکستان میں امریکا کے سفیر ڈونلڈ بلوم نے بلوچستان کے ساحلی شہر گوادر کا ایک اہم دورہ کیا اور اس دوران علاقائی ترقی اور دوطرفہ اقتصادی و تجارتی تعلقات کو فروغ دینے سے متعلق مواقع کا جائزہ لیا ہے۔
اس موقع پر ڈونلڈ بلوم نے کہا کہ امریکا اور بلوچستان کے درمیان تعلق کی ایک طویل تاریخ موجود ہے۔ انہوں نے کہا کہ گزشتہ برس آنے والے تباہ کن سیلاب کے بعد امریکا نے بلوچستان میں خوراک اور امدادی رقم کے ذریعے 6 لاکھ 61 ہزار افراد کی اعانت کی اور 90 ہزار بچوں کو بھوک سے بچانے کے لیے کھانا فراہم کیا۔
انہوں نے کہا کہ امریکا کے تعاون سے بلوچستان میں گزشتہ برس 41 مراکز صحت کی تجدید جبکہ تعلیمی ترقی کے لیے بلوچستان یونیورسٹی آف انفارمیشن ٹیکنالوجی، انجینئرنگ اینڈ مینجمنٹ سائنسز اور سردار بہادر خان ویمن یونیورسٹی میں مختلف پروگرامز کو فروغ دیا گیا۔
انہوں نے کہا کہ اسی طرح بلوچی اور دیگرزبانوں کی تعلیم و تدریس کے فروغ کے ذریعے نوجوانوں کو بااختیار بنانے کے اقدامات کا بھی آغاز کیا گیا۔
سیاسی رہنماؤں سے اپنی ملاقات میں امریکی سفیر نے بلوچستان کی ترقی کے لیے معاشی ترقی، آفات سے نمٹنے کی تیاری اورسیکیورٹی سمیت دوطرفہ تجارت اور سرمایہ کاری کو بہتر بنانے کے لیے اپنے تعاون کا یقین دلایا۔
اس موقع پر انہوں نے ایسے اقدامات کا بھی ذکرکیا جن کے ذریعے پاکستان سرمایہ کاری کے لیے ملک میں ماحول کو بہتر بنا سکتا ہے۔
گوادر کے ایوان صنعت و تجارت کے وفد سے ملاقات میں سفیر ڈونلڈ بلوم نے خطے میں کاروبار، نقل و حمل، سیاحت، ماہی گیری اور سمندر سے متعلقہ معاشی شعبوں میں امریکی تجارت اور سرمایہ کاری کو فروغ دینے کے مواقع پر بات چیت کی۔
مزید پڑھیں
امریکی سفیر سے گوادر کے ایوان صنعت و تجارت کے وفد نے بھی ملاقات کی اور انہیں بتایا کہ کیسے وفاقی حکومت کے ماتحت مقامی قبائل کی شمولیت سے کاروباری تعلقات کو فروغ دے کر بلوچستان بھر میں روزگار میں اضافہ اور دو طرفہ تجارت کو فروغ دیا جا سکتا ہے۔
حکومتی اور کاروباری رہنماؤں سے ملاقاتوں میں سفیرڈونلڈ بلوم نے پاک امریکا سبز اتحاد فریم ورک پر بھی بات کی جو کہ دونوں ملکوں کو مل کر ماحول، توانائی، پانی اور معاشی ضروریات کو پورا کرنے میں معاون ثابت ہو رہا ہے۔
ڈونلڈ بلوم نے کہا کہ بلوچستان سمیت پورے ملک میں ماحولیاتی مسائل سے نمٹنے کے لیے امریکا پاکستان کو استعداد کار میں اضافے، متبادل توانائی اور یکساں معاشی ترقی کو فروغ دینے میں تعاون فراہم کررہے ہیں۔
انہوں نے مزید کہا کہ سبز اتحاد فریم ورک کے تحت 12 ہزار کسانوں کو امریکی معاونت فراہم کی گئی، جن میں سے بیشترکا تعلق بلوچستان سے ہے جبکہ 2 ہزارایکڑ پربہترٹیکنالوجی اور جدید طریقہ کار کو بروئے کار لاکر پیداوارمیں اضافہ اورنقصانات میں کمی لائی گئی۔
امریکی سفیر نے گوادر کی بندرگاہ کا بھی دورہ کیا اور پورٹ اتھارٹی کے چیئرمین پسند خان بلیدی سے ملاقات کی۔ انہوں نے بندرگاہ کے آپریشنز، ترقیاتی منصوبوں اور گوادر کے علاقائی تجارتی مرکز بننے کی صلاحیت اور اسے پاکستانی برآمدات کی سب سے بڑی منڈی امریکا سے منسلک کرنے کے طریقوں پر بھی بات چیت کی۔
پاکستان نیوی کی مغربی کمانڈ سے ملاقات میں سفیر ڈونلڈ بلوم نےعلاقائی امورپر تبادلہ خیال کیا اور آئندہ برسوں میں شراکت داری جاری رکھنے کی ضرورت پرزور دیا۔
