بھارت کی کینیڈا کے ساتھ جاری چپقلش کے پیش نظر بھارتی حکومت نے اپنے شہریوں کو کینیڈا کے سفر میں احتیاط برتنے کی ہدایت کی ہے۔
شہریوں کو جاری کردہ ٹریول ایڈوائزری میں حکومت نے کہا کہ ’کینیڈا میں ہندوستان مخالف سرگرمیوں اور نفرت انگیز جرائم کے پیش نظر سبھی ہندوستانی شہریوں کو مشورہ دیا جاتا ہے کہ وہ وہاں سفر کرتے وقت خاص احتیاط برتیں‘۔
حکومت نے ہندوستانی شہریوں اور کینیڈا میں زیر تعلیم طلبہ کو مشورہ دیا ہے کہ وہ ان علاقوں میں جانے سے گریز کریں جہاں حال ہی میں ہندوستانیوں کے خلاف پرتشدد واقعات پیش آئے ہیں۔
مزید پڑھیں
اپنی ایڈوائزری میں حکومت کا کہنا تھا کہ حال ہی میں ہندوستان مخالف ایجنڈے کے خلاف کھڑے ہونے والے کئی ہندوستانی سفارت کاروں اور ہندوستانی کمیونٹی کے لوگوں کے خلاف پرتشدد واقعات رونما ہوئے ہیں جس کے پیش نظر بھارتی شہری ممکنہ پرتشدد علاقوں میں جانے سے گریز کریں۔
Advisory for Indian Nationals and Indian Students in Canada:https://t.co/zboZDH83iw pic.twitter.com/7YjzKbZBIK
— Randhir Jaiswal (@MEAIndia) September 20, 2023
ایڈوائزری میں یہ بھی کہا گیا ہے کہ کینیڈا میں ہندوستانی ہائی کمیشن ہندوستانی شہریوں کی حفاظت کے لیے وہاں کے حکام کے ساتھ مسلسل رابطے میں ہے۔ حکومت نے کینیڈا میں زیر تعلیم ہندوستانی طلبہ کو خصوصی احتیاط برتنے کا مشورہ دیا ہے اور انہیں ہمیشہ محتاط رہنے کے لیے کہا۔
حکومت نے کینیڈا میں مقیم ہندوستانی شہریوں اور طلبہ سے کہا کہ وہ اوٹاوا میں واقع ہائی کمیشن اور ٹورنٹو اور وینکوور میں واقع قونصل خانوں میں خود کو رجسٹر کریں تاکہ کسی بھی ایمرجنسی کی صورت میں ان سے فوری رابطہ کیا جا سکے۔
