آرمی چیف جنرل عاصم منیر نے کہا کہ ہے کہ ایک پاکستانی شہری کی جان و مال اور فلاح و بہبود کسی بھی دوسرے ملک اور کسی بھی دنیاوی مفاد سے مقدم ہے۔
ذرائع کے مطابق نگراں وزیر اعظم انوار الحق کاکڑ کی زیر صدارت آج نیشنل ایکشن پلان پر غور کرنے کے لیے ایپکس کمیٹی کا اجلاس ہوا۔ اجلاس میں نگراں وزیر اعظم انوار الحق کاکڑ، چاروں صوبوں کے نگراں وزرائے اعلی، آرمی چیف جنرل سید عاصم منیر اور دیگر سیکیورٹی حکام نے بھی شرکت کی۔
اجلاس میں ملک میں حالیہ دہشتگردی کے واقعات پر تشویش کا اظہار کیا گیا، اس موقع پر اجلاس سے خطاب میں آرمی چیف جنرل عاصم منیر نے کہا کہ ’ایک پاکستانی شہری کی جان و مال اور فلاح و بہبود کسی بھی دوسرے ملک اور کسی بھی دنیاوی مفاد سے مقدم ہے۔‘
اجلاس میں نگراں وزیر اعظم انوار الحق کاکڑ نے کہا کہ دہشتگرد مک و قوم کے دشمن ہیں، دہشتگردی کے خلاف جنگ جاری رہے گی۔
ایپکس کمیٹی اجلاس میں دہشتگردوں اور ان کے سہولت کاروں کے خلاف کارروائیاں جاری رکھنے کا فیصلہ کیا گیا ہے اور دہشتگردی کے خلاف زیرو ٹالرنس پالیسی اپنانے پر زور دیا گیا۔ جبکہ غیرملکیوں کے پاکستان سے انخلا کی حمایت کی گئی۔
اجلاس میں فیصلہ کیا گیا کہ پاکستان میں صرف پروف آف رجسٹریشن والے افغان مہاجرین سکونت کے اہل ہوں گے اور تمام غیر قانونی غیر ملکی شہریوں کی پاکستان سے انخلا کے لیے ڈیڈ لائن دی جائے گی، مقررہ ڈیڈ لائن تک انہیں پاکستان چھوڑنا ہوگا۔
اجلاس میں فیصلہ کیا گیا کہ اگر مقرر ڈیڈ لائن تک پاکستان میں غیر قانونی طور پر مقیم شہریوں نے پاکستان نہ چھوڑا تو ان کی جائیدادیں قرق کر کے انہیں ملک بدر کر دیا جائے گا، ڈیڈ لائن تک ان کے پاس موقع ہے کہ وہ اپنی جائیدادیں فروخت کر کے پاکستان چھوڑ دیں۔
