صرف 7 روز باقی ہیں۔ غیر قانونی طور پر مقیم تمام غیر ملکیوں کو 31 اکتوبر تک ہر صورت پاکستان چھوڑنا ہوگا، دوسرا کوئی آپشن نہیں ہے۔ حکومتی فیصلے کے بعد سے افغان باشندوں کی مسلسل اپنے وطن واپسی کا سلسلہ جاری ہے۔ اب تک کل 64 ہزار 7 سو 95 افغان پناہ گزین اپنے وطن واپس لوٹ چکے ہیں۔
گزشتہ روز 2 ہزار 7 سو 16 افغان باشندے اپنے ملک واپس گئے۔ جن میں 622 مرد، 293 خواتین اور 1801 بچے شامل تھے۔ مقررہ مدت 31 اکتوبر کے بعد غیر قانونی افراد کے انخلاء کو یقینی بنانے کے لیے سیکیورٹی اداروں کی جانب سے آپریشن کرنے کا اعلان کیا گیا ہے۔
غیر قانونی طور پر مقیم افراد کو مزید ایک دن کی بھی مہلت فراہم نہ کرنے کا حتمی فیصلہ کیا گیا ہے۔ پاکستان نہ چھوڑنے کی صورت میں گرفتاری اور وطن واپسی کا سامنا کرنا پڑے گا۔
پاکستان نے ہمیشہ افغان مہاجرین کو کھلے دل سے تسلیم کیا ہے اور گزشتہ 40 برس سے انہیں ضرورت زندگی کی تمام سہولیات پہنچائی گئی ہیں۔ حکومت کے حالیہ فیصلے کے بعد سے افغان مہاجرین قافلوں کی صورت بذریعہ طورخم اور چمن بارڈر افغانستان واپس جا رہے ہیں۔ افغانستان روانگی کے لیے 84 گاڑیوں میں 192 خاندانوں کی اپنے وطن واپسی عمل میں لائی گئی اور یہ سلسلہ روزانہ کی بنیاد پر جاری ہے۔
افغان باشندے جہاں وطن واپس جانے پر خوش ہیں وہاں پاکستان میں گزرے اچھے وقت کو یاد کر کے افسردہ بھی ہیں۔ افغان باشندوں کی اپنے وطن واپسی حکومت اور عسکری قیادت کی مشترکہ کاوشوں کا نتیجہ ہے۔
