سابق صدر مملکت و شریک چیئرمین پاکستان پیپلزپارٹی آصف علی زرداری نے زرداری ہاؤس میں پیپلز پارٹی کے رہنماؤں اور کارکنوں سے گفتگو کرتے ہوئے کہا کہ اب وہ نواز شریف کو وزیراعظم نہیں بننے دیں گے، آئندہ وزیراعظم پاکستان پیپلز پارٹی کا ہوگا۔
آصف زرداری نے کہاکہ پیپلز پارٹی عوام کی خدمت پر یقین رکھتی ہے، میں نے شہباز شریف کو وزیراعظم بنایا لیکن انہوں نے لوگوں پر مہنگائی کا بوجھ بڑھایا اور عوام کی خدمت کا کوئی کام نہیں کیا۔
مزید پڑھیں
وی نیوز نے پیپلز پارٹی سندھ کے رہنما سے گفتگو کی اور ان سے استفسار کیا کہ آصف زرداری نے نواز شریف کو وزیراعظم نہ بننے دینے کا بیان دیا ہے، اس بیان کی کیا ضرورت تھی؟۔
تمام سیاسی جماعتوں کا حق ہے کہ وہ الیکشن میں ایک دوسرے کا مقابلہ کریں، نثار کھوڑو
پیپلز پارٹی کے رہنما نثار کھوڑو نے وی نیوز سے خصوصی گفتگو کرتے ہوئے کہاکہ آصف زرداری کا جو بیان اخبار میں شائع ہوا ہے اگر وہ بیان انہوں نے نہ دیا ہوتا تو اس کی تردید کر دی جاتی، پاکستان پیپلز پارٹی ایک سیاسی جماعت ہے اور ہر سیاسی جماعت کی طرح پیپلز پارٹی مسلم لیگ ن کا بھی آئندہ عام انتخابات میں مقابلہ کرے گی۔
نثار کھوڑو نے کہاکہ تمام سیاسی جماعتوں کا حق ہے کہ وہ الیکشن میں ایک دوسرے کا مقابلہ کریں، اگر ن لیگ یہ سمجھتی ہے کہ وہ آئندہ عام انتخابات میں کامیابی حاصل کرے گی تو پیپلز پارٹی بھی سمجھتی ہے کہ وہ آئندہ انتخابات میں کامیابی حاصل کر کے اپنا وزیراعظم بنائے گی۔
ان کا کہنا تھا کہ پیپلز پارٹی عوام کی خدمت پر یقین رکھتی ہے اور یہی وجہ ہے کہ 2008 سے مسلسل سندھ کے عوام پیپلز پارٹی پر اعتماد کر رہے ہیں، پیپلز پارٹی آئندہ انتخابات میں ن لیگ سمیت تمام پارٹیوں کا ڈٹ کر مقابلہ کرے گی، پیپلز پارٹی کی خواہش ہے کہ پاکستان کے آئندہ وزیراعظم کا تعلق پیپلز پارٹی سے ہو۔
