چیئرمین پاکستان علما کونسل حافظ طاہر محمود اشرفی نے کہا ہے کہ پوری پاکستانی قوم فلسطین پر ہونے پر مظالم پر غمزدہ ہے، پاکستان کی حکومت، افواج اور عوام کا فلسطین کے بارے میں وہی موقف ہے جو قائداعظم محمد علی جناح کا تھا۔
ملتان میں یکجہتی فلسطین کانفرنس سے خطاب کرتے ہوئے طاہر اشرفی نے کہاکہ فلسطین سے متعلق پاکستان کی پالیسی میں کوئی تبدیلی نہیں کی گئی، وقت آ گیا ہے کہ امت مسلمہ فلسطین اور کشمیر کے لیے کھڑی ہو جائے، امت مسلمہ کو فلسطین سے متعلق ایک پیج پر آنا چاہیے، امید ہے تمام اسلامی ممالک اس حوالے سے مشترکہ پالیسی دیں گے۔
مزید پڑھیں
انہوں نے کہا کہ مسئلہ فلسطین کا واحد حل آزاد فلسطینی ریاست کا قیام ہے۔ پاکستان میں کچھ لوگ صرف پروپیگنڈا کرنا چاہتے ہیں، ہمارے لیے فلسطین اور کشمیر مشترکہ مسئلہ ہے۔
انہوں نے کہا کہ گوادر اور پی ایف ایئر بیس میانوالی پر دہشت گردی کے حملے ہوئے، ہمارے سیکیورٹی اداروں نے دہشت گردی کے حملوں کو ناکام بنایا، گوادر میں جام شہادت نوش کرنے والے جوانوں کو سلام پیش کرتے ہیں۔
طاہر اشرفی نے کہاکہ پاکستان میں دہشت گردی کی لہر دوبارہ کیوں آئی یہ سوچنے کی بات ہے، پاکستان میں سرمایہ کار آ رہے ہیں جو دشمن عناصر کو پسند نہیں۔
انہوں نے کہا کہ پاکستانی اداروں پر حملہ آور ہونا، مسلح جماعتیں بنانا، عوام پر حملہ آور ہونا شرعی اور قانونی طور پر ٹھیک نہیں، پاکستان علما کونسل پورے ملک میں یہ پیغام لے کر جا رہی ہے کہ پاکستان میں خود کش حملے، پاکستانی تنصیبات پر حملے شرعی اور قانونی طور پر جائز نہیں ہیں۔
افغانیوں کی 40 سال تک مہمان نوازی کی، اب شکوہ نہ کریں
چئیرمین علما کونسل نے کہا کہ افغانی ہمارے بھائی ہیں، 40 سال تک ان کی مہمان نوازی کی، پاکستان کو یہ حق حاصل ہے کہ وہ یہ جانے کہ ان کے ملک میں کون رہ رہا ہے۔
طاہر اشرفی نے کہاکہ دنیا میں کسی بھی ملک میں غیر قانونی طور پر کوئی نہیں رہ سکتا، افغانیوں سے سوال کرتا ہوں کیا پاکستان کا حق نہیں ہے کہ وہ یہاں رہنے والوں کی چھان بین کر سکے، 40 سال مہمان نوازی کی ہے، افغانیوں کو چاہیے شکوہ نہ کریں، افغانستان کا امن پاکستان کا امن ہے،ہم چاہتے ہیں افغانستان خوشحال ہو اور پُر امن ہو۔
انہوں نے کہا کہ گوادر اور پی ایف ایئر بیس میانوالی پر حملے میں ہندوستان اور دیگر پاکستان دشمن عناصر ملوث ہیں۔ وفاقی وزیر داخلہ سے مطالبہ ہے کہ جنہوں نے حملوں پر منفی پروپیگنڈا کیا ان کے خلاف ایکشن لیا جائے۔
طاہر اشرفی نے کہا کہ اگر 9 مئی کے واقعات پر سزا ہو چکی ہوتی تو ایسے منفی پروپیگنڈے نہ ہوتے، ہم عدلیہ سے کہتے ہیں کہ 9 مئی کے واقعات پر انصاف کرے۔
