جماعت اسلامی پاکستان کے امیر سراج الحق نے کہا ہے کہ اسرائیل فلسطین کے مظلوم عوام پر مظالم کے پہاڑ توڑ رہا ہے لیکن دنیا اسے روکنے میں ناکام نظر آتی ہے۔ ہم غزہ جانے کے لیے تیار ہیں اور امریکا و اسرائیل کو جلد شکست ہو گی۔
اسلام آباد میں غزہ مارچ کے شرکا سے خطاب کرتے ہوئے سراج الحق نے کہاکہ مسلمان حکمران فیصلہ کریں کہ وہ امریکا کی غلامی کریں گے یا اللہ کی، جب تک اسرائیل غزہ کے مسلمانوں پر مظالم بند نہیں کرتا ہم تحریک جاری رکھیں گے۔
لبیک لبیک یااقصی لبیک
غزہ مارچ نعروں سے گونج اٹھا#PakistanGazaMarch pic.twitter.com/ZZLAibTM58— Jamaat e Islami Pakistan (@JIPOfficial) October 29, 2023
امیر جماعت اسلامی پاکستان نے 19 نومبر کو لاہور میں غزہ کے عوام سے اظہار یکجہتی کے لیے ملین مارچ کا اعلان کیا ہے۔
مزید پڑھیں
سراج الحق نے کہاکہ مسلم حکمرانوں کو فیصلہ کرنا ہو گا کہ وہ کدھر کھڑے ہیں ورنہ امت مسلمہ اٹھ کھڑی ہو گی، اور پھر تم میر جعفر اور میر صادق تصور کیے جاؤ گے۔
امیر جماعت اسلامی نے کہاکہ کل یہ تاثر دیا گیا کہ ہم امریکا کے سفارتخانے پر قبضہ کرنا چاہتے ہیں اور ہمارے کارکنوں پر لاٹھیاں برسائی گئیں۔
انہوں نے کہاکہ غزہ مارچ میں آنے والوں کو شاباش دیتا ہوں کیوںکہ بیت المقدس کی آزادی کا جہاد صرف عربوں کا مسئلہ نہیں یہ ہر مسلمان کا مسئلہ ہے۔
سراج الحق نے کہاکہ بیت المقدس کے معاملے پر ہمارے مسلمان حکمرانوں نے وہ فرض ادا نہیں کیا جو ان کو کرنا چاہیے تھا۔
انہوں نے کہاکہ گزشتہ روز جب اسلام آباد انتظامیہ ہمارے کارکنوں پر لاٹھیاں برسا رہی تھی اس وقت ترکیہ کے صدر لاکھوں کے مجمع سے خطاب کر رہے تھے جس میں انہوں نے یہ پیغام دیا کہ حماس دہشتگرد تنظیم نہیں ہے۔
اسلام آباد – غزہ میں جاری اسرائیلی مظالم کے خلاف امریکی سفارتخانے کے باہر لاکھوں پاکستانیوں کا احتجاج، مظلوم اہل فلسطین سے اظہاریکجہتی#PakistanGazaMarch pic.twitter.com/g6l2b1nc3H
— Jamaat e Islami Pakistan (@JIPOfficial) October 29, 2023
سراج الحق نے کہاکہ اقوام متحدہ کے سیکریٹری جنرل نے خود اعتراف کیا ہے کہ اسرائیل 56 سال سے فلسطینیوں کی سرزمین پر قابض ہے۔
انہوں نے کہاکہ آج اگر حضرت عمر فاروق ؓ اور حضرت علی ؓ زندہ ہوتے تو وہ یقیناً غزہ کے مجاہدین کے ساتھ کھڑے ہونے کا کہتے۔
یہ بھی پڑھیں اسرائیلی فوج کی غزہ پر بمباری، ممتاز فلسطینی شاعرہ بھی شہید
سراج الحق نے کہاکہ ہم تحریک جاری رکھیں گے جبکہ الخدمت فاؤنڈیشن غزہ کے متاثرہ عوام کی مدد کے لیے ترکیہ کے دوستوں کے ساتھ مل کر کام کر رہی ہے اور اب تک پاکستان سے ایک ارب روپے سے زیادہ کی رقم اکٹھی ہو چکی ہے۔
اسلام آباد – جماعت اسلامی کے ڈائریکٹر امور خارجہ امریکی سفارتخانے کے سامنے تاریخی غزہ مارچ سے خطاب کر رہے ہیں #PakistanGazaMarch pic.twitter.com/uczGMAEB2U
— Jamaat e Islami Pakistan (@JIPOfficial) October 29, 2023
انہوں نے کہاکہ آج ہونا تو یہی چاہیے تھا کہ مسلم ممالک کے وزرائے خارجہ اور فوجی سربراہان بھی غزہ کے معاملے پر ایک ہو کر ایک پیغام دیتے۔
سراج الحق نے طنز کرتے ہوئے کہاکہ انڈیا اور امریکا کی اداکارائیں تو اسرائیل کی مذمت کر رہی ہیں مگر ہمارے حکمرانوں میں اتنی جرات نہیں ہو رہی۔
ان کا کہنا تھا کہ افغانوں نے امریکا اور اب حماس نے اسرائیل کو کارروائی کر کے پیغام دیا ہے کہ ایمان کی طاقت ٹیکنالوجی سے کہیں مضبوط ہے۔
