پاکستان کرکٹ ٹیم کے سابق آل راؤنڈر عبدالرزاق نے قومی کرکٹ ٹیم کی کارکردگی کے حوالے سے گفتگو کرتے ہوئے ایشوریہ رائے کا حوالہ دے کر دی گئی مثال پر معذرت کر لی۔
عبدالرزاق نے سوشل میڈیا پر اپنے ویڈیو بیان میں کہا ہے کہ میں کوئی اور مثال دینا چاہتا تھا مگر زبان پھسل گئی جس پر معذرت خواہ ہوں۔
واضح رہے کہ سابق آل راؤنڈر عبدالرزاق نے ایک مباحثے کے دوران کہا تھا کہ اگر آپ کی سوچ یہ ہے کہ میں ایشوریہ رائے کے ساتھ اس وجہ سے شادی کروں کہ وہاں سے بڑا نیک اور پرہیزگار بچہ پیدا ہوجائے تو ایسا کبھی بھی نہیں ہوتا، آپ کو پہلے نیت اپنی ٹھیک کرنا پڑی گی۔
مزید پڑھیں
عبدالرزاق نے قومی کرکٹ ٹیم کی کارکردگی کو نشانہ بناتے ہوئے کہا تھا کہ جب نیتیں ہی صاف نہ ہوں تو نتیجہ کیسے اچھا آ سکتا ہے؟۔
گفتگو کے دوران عبد الرزاق کا کہنا تھا کہ میں نیت کی بات کرتا ہوں۔ انہوں نے اپنے دور کے بارے میں بات کرتے ہوئے کہاکہ مجھے پتا تھا کہ ہمارے کپتان یونس خان کی نیت بہت اچھی ہے، اس چیز نے مجھے اعتماد دیا اور میں نے ڈلیور بھی کیا۔
ان کا مزید کہنا تھا کہ پاکستان ٹیم کی اور کھلاڑیوں کی یہاں بڑی باتیں چل رہی ہیں، ہماری نیت ہی نہیں ہے کہ کسی چیز کو بہتر کیا جائے۔
عبدالرزاق کی ایشوریہ رائے کے حوالے سے مثال پر شاہد آفریدی اور عمر گل سابق کرکٹر کو روکنے یا مذمت کرنے کے بجائے ہنستے اور تالیاں بجاتے نظر آئے۔
اس تناظر میں عبد الرزاق کے بیان کے ساتھ ساتھ شاہد آفریدی اور عمر گل کے کردار کو سوشل میڈیا پر خوب تنقید کا نشانہ بنایا جا رہا ہے۔
سوشل میڈیا پر عبدالرزاق کو شدید تنقید کا نشانہ بنائے جانے کے بعد سابق آل راؤنڈر نے اپنے الفاظ پر معذرت کرتے ہوئے وضاحت پیش کی ہے کہ دراصل وہ کوئی اور مثال دینا چاہتا تھے مگر زبان پھسل گئی۔
