لاہور ہائیکورٹ نے بغیر لائسنس گاڑیاں چلانے والے ڈرائیوروں کے خلاف بلا تفریق سخت کریک ڈاؤن کا حکم دیتے ہوئے کہا ہے کہ لائسنس کے بغیر گاڑی چلانے والوں کو گرفتار کیا جانا چاہیے۔
لاہور کے علاقے ڈیفنس میں کار کی ٹکر سے ایک ہی خاندان کے 6 افراد کی ہلاکت میں نامزد ملزم افنان شفقت کی جانب سے کم عمری کے پیش نظر قانونی تحفظ کی درخواست پر سماعت لاہور ہائیکورٹ کے جسٹس علی ضیا باجوہ نے کی۔
عدالتی حکم پر چیف ٹریفک پولیس آفیسر لاہور اور ایس ایس پی پولیس عدالت میں پیش ہوئے، جسٹس علی ضیا باجوہ نے ریمارکس دیتے ہوئے کہا کہ کار حادثہ بہت افسوسناک واقعہ ہے، اگر سڑک پر 10 لاکھ گاڑیاں ہیں تو لائسنس یافتہ ڈرائیورز صرف 2 لاکھ ہیں۔
چیف ٹریفک آفیسر مستنصر فیروز نے عدالت کو بتایا کہ شہر میں 73 لاکھ گاڑیاں جبکہ 13 لاکھ شہری ڈرائیونگ لائسنس رکھتے ہیں، جس پر عدالت نے دریافت کیا کہ بغیر لائسنس کے گاڑیوں کے خلاف کیا اقدامات کر رہے ہیں، اس واقعے کے بعد ہی بتا دیں کہ کیا کیا کاروائی کی ہے۔
مزید پڑھیں
سی ٹی او لاہور نے بتایا کہ پچھلے 3 دن کے دوران ٹریفک پولیس نے اس ضمن میں کریک ڈاؤن کیا ہے، بغیر لائسنس کے گاڑیاں چلانے والوں کے خلاف 999 مقدمات درج کیے گئے ہیں۔ جسٹس علی ضیا باجوہ نے ریمارکس دیے کہ ہوتا یہ ہے کہ اگر کسی کو ٹریفک وارڈن روکے تو اگلا بندہ کہتا ہے کہ وہ وکیل ہے یا جج کا بیٹا ہے، یا پھر ایس ایس پی کا عزیز ہے۔
جسٹس علی ضیا باجوہ نے ریمارکس دیے کہ یہ جرائم زیادہ پوش علاقوں میں ہوتا ہیں، کارروائی بلا تفریق ہونی چاہیے، عدالتی استفسار پر سی ٹی او نے بتایا کہ جو لوگ خود اپنے کمسن بچوں کو گاڑیاں دیتے ہیں انکے خلاف قانون موجود ہے، اور سی کے تحت ان کے خلاف کارروائی ہوتی ہے۔
لاہور ہائیکورٹ نے حکم دیا ہے کہ لائسنس کے بغیر کوئی گاڑی سڑک پر نہ آئے، کوئی بھی خلاف ورزی کا مرتکب ہو اس کے خلاف بلا تفریق کاروائی کی جائے۔ عدالت نے ملزم افنان شفقت کی درخواست پر پولیس سے جواب طلب کرتے ہوئے سماعت ملتوی کردی۔
