جسٹس اعجاز الاحسن نے سپریم کورٹ کے بینچز کی تشکیل پر سوالات اٹھاتے ہوئے اس حوالے سے قائم کی گئی کمیٹی کے سیکرٹری کو خط لکھا دیا ہے اور کہا ہے کہ کمیٹی میں ملٹری کورٹس کیسز میں اپیل کے لیے 7 رکنی بینچ پر اتفاق ہوا تھا۔
سیکرٹری کمیٹی کو لکھے گئے خط میں جسٹس اعجاز الاحسن نے کہا کہ کمیٹی میں ملٹری کورٹس کیس میں اپیل کے لیے 7 رکنی بینچ پراتفاق ہوا تھا، طے پایا تھا کہ سنیارٹی کے لحاظ سے ججز بینچ میں شامل ہوں گے۔ لیکن خصوصی بینچز کی تشکیل کمیٹی میں نہیں ہوئی۔
مزید پڑھیں
انہوں نے خط میں مزید لکھا ہے کہ اجلاس میں واضح کہا گیا تھا کہ ’پک اینڈ چوز‘ کے تاثر کو زائل کیا جائے اور سپریم کورٹ کے سینیئر ججز پر مشتمل بینچ تشکیل دیا جائے۔
جسٹس اعجاز الاحسن کی جانب سے انتظامی کمیٹی رجسٹرارآفس سپریم کورٹ کو لکھے گئے خط میں فوجی عدالتوں کے ٹرائل اور جسٹس مظاہر نقوی کے لیے تشکیل دیے گئے بینچز پر اعتراض کیا ہے۔
خط میں جسٹس اعجاز الاحسن نے مؤقف اختیار کیا ہے کہ 7 دسمبر کو 4 بجے چیف جسٹس آف پاکستان کے دفتر میں اجلاس ہوا جس کا ایجنڈا مجھے متعدد مرتبہ رابطوں کے بعد دیا گیا، سویلنز کے فوجی عدالتوں میں ٹرائل کے مقدمے کے بارے میں مجھے بتایا گیا تھا اس کے لیے 7 رکنی بینچ تشکیل دیا جائے گا۔
CamScanner 12-11-2023 15.21.04 by Iqbal Anjum on Scribd
جسٹس اعجاز الاحسن نے خط میں مزید لکھا کہ ’پسند نہ پسند کے تاثر سے بچنے کے لیے میرا مؤقف تھا کہ تمام سینیئرز کو بینچ میں شامل کیا جائے جس پرچیف جسٹس نے میری تجویز کو ججز کی آمادگی کے ساتھ مشروط کردیا۔ اسی اصول پر جلد سماعت کی درخواستوں پر بھی اتفاق کیا گیا تھا۔
انہوں نے خط میں مزید لکھا کہ کمیٹی کی جانب سے 2 مقدمات کی منظوری نہیں دی گئی تھی، ان 2 خصوصی بینچز کی تشکیل کو کمیٹی میں رکھا جاتا تو میں اپنی کوئی رائے دیتا جب کہ کمیٹی کے اجلاس میں 7 رکنی بینچ پراتفاق کی بجائے 6 رکنی بینچ تشکیل دیا گیا۔
انہوں نے مزید لکھا کہ سینیئر ججز کے بینچ میں شامل نہ ہونے کے حوالے سے میں مکمل اندھیرے میں ہوں۔ 3 رکنی خصوصی بینچ کی تشکیل میں بھی سنیارٹی کو مد نظر نہیں رکھا گیا ۔ اس کے علاوہ عدالتی وقاراور شفافیت کو مد نظرکر سنیارٹی کے اصول پر کاربند رہنے پراتفاق کیا گیا تھا۔
جسٹس اعجاز الاحسن نے کہا کہ یہ بھی اتفاق کیا گیا تھا کہ متعلقہ ججز کا مؤقف لینے کے بعد کمیٹی ممبران کو آگاہ کیا جائے گا۔ جمعہ کے روز 2 مرتبہ کالز کرنے کے بعد بتایا گیا کہ فائل چیف جسٹس کے چیمبر میں منظوری کے لیے گئی ہے۔ انتظار کرنے کے باجود 6:30 پر پھر کال کرنے پر بتایا گیا کہ رجسٹرارجا چکی ہیں۔ چوتھی اور پانچویں کمیٹی اجلاس کے منٹس نہ تو بھجوائے گئے نہ دستخط لیے گئے۔ ان منٹس کو بغیر میری منظوری سپریم کورٹ کی ویب سائٹ پرجاری کردیا گیا۔
