اسلام آباد ہائیکورٹ نے العزیزیہ اسٹیل ملز ریفرنس میں نواز شریف کی بریت کا مختصر تحریری فیصلہ جاری کر دیا ہے۔
اسلام آباد ہائیکورٹ کے چیف جسٹس عامر فاروق اور جسٹس میاں گل حسن اورنگ زیب نے ایک صفحے پر مشتمل مختصر فیصلہ جاری کیا۔
عدالت کے تحریری فیصلے میں کہا گیا ہے کہ العزیزیہ ریفرنس میں نواز شریف کی سزا کے خلاف اپیل منظور کی جاتی ہے، نواز شریف کی اپیل منظور کرنے کی وجوہات تفصیلی فیصلے میں جاری کی جائیں گی۔
عدالتی فیصلے میں نواز شریف کی سزا سے متعلق احتساب عدالت کے 24 دسمبر 2018ء کے فیصلے کو کالعدم قرار دیا گیا ہے۔
اسلام آباد ہائیکورٹ نے مختصر تحریری فیصلے میں کہا ہے کہ العزیزیہ ریفرنس میں نواز شریف کو تمام الزامات سے بری کیا جاتا ہے۔
واضح رہے کہ گزشتہ روزا سلام آباد ہائیکورٹ نے ایون فیلڈ کے بعد العزیزیہ ریفرنس میں بھی قائد پاکستان مسلم لیگ ن میاں نواز شریف کو بری کر دیا تھا۔
