کراچی بلدیہ فیکٹری کیس میں سزائے موت پانے والے رحمان اور زبیر کی سپریم کورٹ میں اپیل

سانحہ بلدیہ فیکٹری آتشزدگی کیس میں سزا یافتہ رحمان عرف بھولا اور زبیر چریا نے سزا کے خلاف سپریم کورٹ میں اپیل دائر کردی۔

زبیر چریا اور رحمان بھولا کی جانب سے سزائے موت کالعدم قرار دینے کی استدعا کی گئی ہے۔ یاد رہے کہ انسداد دہشت گردی عدالت نے دونوں کو پھانسی دینے کا فیصلہ سنایا تھا اور سندھ ہائیکورٹ نے سزا کے خلاف ان کی اپیلیں مسترد کردی تھیں۔

کیس میں ایم کیو ایم تنظیمی کمیٹی کے انچارج حماد صدیقی کو اشتہاری قرار دیا گیا تھا اور سندھ ہائیکورٹ نے کیس کے مفرور اور اشتہاری ملزم حماد صدیقی کو گرفتار کرنے کا حکم بھی صادر کیا تھا۔

یاد رہے کہ علی انٹرپرائز فیکٹری بلدیہ میں آتشزدگی سے 259 افراد جاں بحق اور متعدد زخمی ہو گئے تھے۔

انسداددہشت گردی عدالت نے ایم کیوایم رہنما رؤف صدیقی سمیت 5 ملزمان کو بری کردیا  تھا اور سندھ ہائیکورٹ نے فیکٹری ملازم شاہ رخ سمیت 4 افراد کی سزا کے خلاف اپیل منظور کرلی تھیں۔