سعودی عرب کے شہر مدینہ میں سائیکل سواروں کے لیے 70 کلومیٹر طویل مخصوص راستوں کی تعمیر مکمل کرلی گئی ہے، اب مدینہ کے شہری ہی نہیں بلکہ غیرملکی افراد بھی وہاں بہ آسانی اور محفوظ طریقے سے گھوم پھر سکیں گے۔
سعودی میڈیا کے مطابق بلدیہ مدینہ کے شہری ترقی کے منصوبے کے تحت یہ راستے شہر کی مرکزی سڑکوں کے ساتھ ساتھ اور رہائشی علاقوں میں تعمیر کیے گئے ہیں، ان سائیکل ٹریکس کا مقصد شہر میں ماحول اور معیار زندگی کو بہتر کرنا اور کھیلوں کا فروغ ہے۔
مزید پڑھیں
امید ظاہر کی جا رہی ہے کہ یہ ٹریکس سائیکلنگ کا آغاز کرنے والوں اور پیشہ ور کھلاڑیوں کی مہارت میں اضافہ اور عام شہریوں میں صحت اور کھیلوں سے متعلق شعور اجاگر کرنے میں معاون ثابت ہوں گے، اس کے علاوہ شہری ان سائیکل ٹریکس کو نقل و حمل کے متبادل اور محفوظ ذرائع کے طور پر بھی استعمال کرسکیں گے۔
ان سائیکل ٹریکس کو تمام طبقات اور ہر عمر کے افراد بشمول خصوصی افراد کے لیے سیکیورٹی اور حفاظتی معیارات کے مطابق اور شاہراہوں سے الگ رکھ کر ڈیزائن کیا گیا ہے۔ منصوبے کے تحت 2025ء کے آخر تک سائیکل ٹریکس کے اس محفوظ نیٹ ورک کو 220 کلومیٹر تک بڑھا کر مدینہ کے 33 اہم مقامات تک پہنچایا جائے گا۔
اس کے علاوہ مدینہ منورہ میں آنے والے زائرین اور دیگر افراد ’کریم بائیک‘ اور اس کے اسٹیشنز کی بدولت بہ آسانی تاریخی اور پرکشش مقامات کے دورے کرسکیں گے اور منفرد تجربات سے لطف اندوز ہوسکیں گے۔ یہ سروس مسجد نبوی کے مرکزی اور قریبی علاقوں میں بھی دستیاب ہو گی۔
