یہ تو ہم سب نے سن رکھا ہے کہ سعودی عرب میں دسترخوان اس وقت تک مکمل نہیں ہوتا جب تک اس پر کھجور موجود نہ ہو، لیکن آپ کو یہ سن کر حیرت ہو گی کہ اب کھجور سے مہنگی ترین پرفیوم اور شیمپو سمیت دیگر مصنوعات بھی تیار کی جا رہی ہیں۔
سعودی عرب میں کھجور کی دنیا میں 30 سال کا تجربہ رکھنے والے سرمایہ کار اور کسان علی الیاسین نے پرفیوم اور شیمپو سمیت 60 مصنوعات تیار کرنے میں کامیابی حاصل کر لی ہے۔
مدینہ کی کھجور مارکیٹ دنیا بھر میں کیوں مشہور ہے؟
نیوز ویب سائیٹ العربیہ اردو کے مطابق علی الیاسین نے بتایا کہ وہ 1998 سے کھجور کے درخت اگانے اور اس کے اجزا سے مختلف اشیا تیار کرنے میں مصروف تھے۔
انہوں نے کہاکہ 2015 میں ہم نے کھجور کے پاؤڈر تیار کر کے کھجور کے درختوں کی دنیا میں مینوفیکچرنگ انڈسٹریز کے منصوبے کا آغاز کیا۔ ہم نے کھجور کو خشک کیا اور ان کی نمی کو ہٹا کر ایک ایسا پاؤڈر بنایا جو سفید شکر کی جگہ لے سکے۔
علی الیاسین بتاتے ہیں کہ اب تک وہ 60 متبادل مصنوعات کی تیاری میں کامیاب ہو چکے ہیں جن میں کھجور کے کیپسول، گولیاں شامل ہیں، جبکہ پرفیوم جدید ترین پراڈکٹ میں شامل ہے۔
انہوں نے کہاکہ کھجور کے عطر کا خیال کھجوروں کی خصوصیات اور ان کے مشتقات سے متاثر ہونے کے بعد کیا۔
انہوں نے مزید کہا کہ میں نے بہترین خام سے خوشبو دار تیل شامل کرنے کے علاوہ کھجور سے نکالے گئے بہترین قدرتی عناصر کا استعمال کیا جس سے پرفیوم تیار کیا گیا۔
علی الیاسین کے مطابق کھجور کے عطر کی قیمتیں 200 سے 300 سعودی ریال کے درمیان ہیں۔
