پاکستان بھر سے مزید 30 ماحولیاتی نمونوں میں سے پولیو وائرس کی تصدیق ہو گئی، ان 30 میں سے 28 ماحولیاتی نمونے جنوری 2024 میں حاصل کیے گئے ہیں۔
محکمہ صحت کی جانب سے فراہم کی گئی معلومات کے مطابق پولیو وائرس پنجاب، سندھ، خیبر پختونخواہ اور بلوچستان کے مختلف شہروں کے ماحولیاتی نمونوں میں پایا گیا ہے، جن میں 30 میں سے 28 ماحولیاتی نمونے جنوری 2024 میں حاصل کیے گئے ہیں۔
مزید پڑھیں
محکمہ صحت کے مطابق بلوچستان میں پولیو وائرس کوئٹہ، خضدار، کیچ، نصیر آباد، پشین، چمن کے ماحولیاتی نمونوں میں پایا گیا جب کہ کراچی کے تمام اضلاع کے ماحولیاتی نمونوں میں بھی پولیو وائرس کی تصدیق ہوئی ہے۔
کراچی سمیت حیدرآباد، سکھر، جامشورو میں بھی پولیو وائرس کی تصدیق ہوئی ہے اس کے علاوہ خیبر پختون خواہ میں پشاور جبکہ پنجاب میں لاہور، راولپنڈی اور ڈیرہ غازی خان کے ماحولیاتی نمونوں میں پولیو وائرس کی تصدیق ہوئی ہے۔
واضح رہے کہ گزشتہ سال پاکستان بھر کے 126 ماحولیاتی نمونوں میں پولیو وائرس کی تصدیق ہوئی تھی جب کہ اس سال جنوری کے مہینے میں اب تک 28 ماحولیاتی نمونوں میں پولیو وائرس کی تصدیق ہو چکی ہے۔
